Densaýlyq saqtaý salasy synaldy

«Nur Otan» partııasy Astana qalalyq fılıaly janyndaǵy sybaılas jemqorlyqqa qarsy kúres qoǵamdyq keńesiniń otyrysy bolyp ótti. Onda elordalyq densaýlyq saqtaý salasyndaǵy sybaılas jemqorlyqqa qarsy kúres deńgeıin anyqtaý men jemqorlyq kórinisterine jol beretin sebepter men jaǵdaılardy eskertý jáne joıý máseleleri qaraldy. Keńes otyrysyna onyń tóraǵa­sy, Parlament Májilisiniń depý­taty Ramazan Sárpekov, «Nur Otan» partııasy Astana qalalyq bólimshesi tóraǵasynyń orynba­sary Meırambaı Oralov, den­saý­lyq saqtaý salasyndaǵy ýáki­let­ti memlekettik atqarýshy organ­dardyń basshylary, Astana qalasy máslıhatynyń depýtattary jáne t.b. qatysty. Otyrysta sóz alǵan R.Sárpekov: «Memleket basshysynyń tapsyrmalaryna baılanysty sybaılas jemqorlyqqa qarsy júıeli kúresti odan ári kúsheıtip, azamat­tarymyzdyń quqyn nyǵaıta túsý­i­miz qajet» dep atap kórsetti. Al óz kezeginde sóz alǵan As­ta­na qalasy densaýlyq saqtaý bas­qarmasynyń basshysy Aıgúl Segiz­baeva baqylaý jáne qadaǵalaý organdarynyń, onyń ishinde Esep komıteti, prokýratýra organdary, Qarjy baqylaý ınspeksııasy jáne t.b. tıisti mekemelerdiń júrgizgen tekseristerin alǵa tartty. Máselen, ótken jyly basqarmada 6 tekseris oryn alǵan, oǵan 167 kún ketken. Sóıtip, A.Segizbaevanyń aıtýyna qaraǵanda, jalpy medısınalyq uıymdarda 97 tekseris oryn alsa, oǵan barlyǵy 1080 kún jumsalǵan, demek jylyna bir medısınalyq uıymǵa 3-4 tekseristen keledi eken. Desek te, osy tekseristerdiń arqasynda biraz syrdyń beti ashylǵan sekildi. Máselen, avtokólik quraldaryna arnalǵan shyǵyn lımıti asyra kór­setilgen, nesıe bereshegi bolsa da syıaqy taǵaıyndaý men ne­giz­­siz qosymsha aqy tóleý, syı­aqy­lardy josparlaý, joǵary nor­matıvti dárejelerdi ustaý, kas­salyq tártipti buzýmen qatar, dári­hanalardaǵy dári-dármekterdiń jetkiliksizdigi jáne negizgi qara­jat­tardy esepten shyǵarý men qarjylyq esepti burmalaý keń óris alǵan eken. Osy atalǵan kemshilikterge baı­lanysty der ýaqytynda tıisti sha­ralar qabyldanyp, kináli adamdar, ıaǵnı basqarmanyń qos bólim jetekshisi jaýapqa tartyldy. Olarǵa qatań sógis jarııalandy.­ Medısınalyq uıymdardaǵy 40 ma­mannyń 32-si sógis alsa, 8-ine eskertý berildi. Birinshi basshylardyń, olardyń orynbasarlary men bas esepshilerdiń jalaqylary tolyqtaı qaıta qaraldy. Eńbekaqyny taǵaıyndaýdyń ońtaılandyrylǵan úrdisi iske qosyldy. Shuǵyl qabyl­daý bólimderiniń shtaty kóbeıip, on­da­ǵy dárigerlerdiń aılyǵy ul­ǵaı­tyldy, dep túsinik berdi sońynda A. Segizbaeva. Sonymen qatar, ol nelikten naýqas jandar jedel járdemdi eki saǵat boıy kútedi degen suraqqa da jaýap qaıtardy. Onyń aıtýynsha, barlyq shaqyrtýlar 15 mınót ishinde qamtamasyz etilmeıtin kórinedi. О́ıtkeni, ár shaqyrtýdyń jóni bólek, sondyqtan, árqaısysy ártúrli, ıaǵnı ótinish pen naýqastyń aýyrlyǵyna saı dárejelenedi. Osy­ǵan baılanysty qazirgi kúni jedel járdem júgin azaıtý maqsatynda keńester beretin núkteler sany arttyrylypty. Al munyń naýqastar úshin qandaı tıimdi kómegi bolary ázirge belgisiz. Biraq dárigerler aýyryp jatqan naýqastardyń kóńilin qyzyl sózben de jubata bilse, kim biledi, shıpa bolaryna senimdi sekildi. Aleksandr TASBOLATOV, «Egemen Qazaqstan».