ASTANA. 19 naýryz. Mańǵystaý oblystyq sotynyń tóraǵasy bolyp Jaqsylyq Rzabekuly Alanov taǵaıyndaldy. Bul týraly oblystyq sottyń baspasóz qyzmeti habarlady.
Jańa basshyny Joǵarǵy Sottyń azamattyq jáne ákimshilik ister jónindegi qadaǵalaýshy sot alqasynyń tóraǵasy Elis Nurqasymuly Ábdiqadyrov tanystyrdy. Sharaǵa Mańǵystaý oblysynyń sot korpýsy, oblys ákiminiń birinshi orynbasary Súıindik Aldashev, oblystyq máslıhat hatshysy Bekmurat Júsipov, óńirdegi quqyq qorǵaý jáne basqa da salalardyń basshylary men ókilderi qatysty.
Joǵarǵy Sottyń azamattyq jáne ákimshilik ister jónindegi qadaǵalaýshy sot alqasynyń tóraǵasy Elis Nurqasymuly jınalǵandardy jańa tóraǵanyń ómirbaıanymen tanystyrdy.
J.Alanov ár jyldary Batys Qazaqstan, Atyraý oblystyq sottarynda sýdıa, alqa tóraǵasy, sot tóraǵasy qyzmetterin atqarǵan, sondaı-aq Joǵarǵy Sottyń sýdıasy bolǵan. Osy taǵaıyndaýǵa deıin Astana qalalyq sotynda sýdıa qyzmetin atqardy, búginge deıingi sot júıesindegi eńbek ótili 20 jylǵa jýyqtaıdy.
Buǵan deıin oblystyq sottyń tóraǵasy qyzmetin atqaryp kelgen Dosjan Sarmanqululy Ámirov Shyǵys Qazaqstan oblystyq sotyna tóraǵa bolyp taǵaıyndaldy. Mańǵystaý oblysy ákiminiń orynbasary S.Aldashev oǵan aımaq basshysynyń alǵys hatyn tapsyrdy.
Joldybaı Bazar.
Derek, sýret: Mańǵystaý oblystyq sotynyń baspasóz qyzmeti.