Mańǵystaý oblysynda múgedektigi bar adamdardyń quqyqtaryn qamtamasyz etý jáne olar úshin qolaıly orta qalyptastyrý baǵytynda júıeli jumystar júrgizilip jatyr. Sonyń nátıjesinde búgingi tańda óńirde 567 áleýmettik ınfraqurylym nysany tolyqtaı beıimdelgen, dep habarlaıdy Egemen.kz.
Bul bastama Qazaqstan Respýblıkasynda júzege asyp jatqan birqatar iri baǵdarlamalar aıasynda iske asyrylyp jatyr. Atap aıtqanda, 2025-2030 jyldarǵa arnalǵan ınklıýzıvti saıasat tujyrymdamasy, «AMANAT» partııasynyń 2023-2027 jyldarǵa arnalǵan jol kartasy jáne Prezıdent bastamasymen qolǵa alynǵan «Halyqpen birge» jobasy.
Eńbek jáne halyqty áleýmettik qorǵaý mınıstrliginiń habarlaýynsha, «AMANAT» partııasynyń jol kartasyna sáıkes, el boıynsha 42 myńnan astam nysan ınteraktıvti qoljetimdilik kartasyna engizilgen. Bul nysandardy kezeń-kezeńimen beıimdeý kózdelip otyr: 2023 jyly – 20%, 2024 jyly – 40%, al 2027 jyldyń sońyna deıin tolyq beıimdelýi tıis. Qazirgi ýaqytta respýblıka boıynsha 23 206 nysan qoljetimdi etildi.
Mańǵystaý oblysy boıynsha beıimdelgen 567 nysannyń ishinde:
Densaýlyq saqtaý mekemeleri – 87; Bilim berý uıymdary – 259; Mádenıet oryndary – 28; Memlekettik jáne kvazımemlekettik mekemeler – 73; Sport nysandary – 9; Áleýmettik qorǵaý mekemeleri – 4; Saýda jáne oıyn-saýyq ortalyqtary – 81; Kólik ınfraqurylymy – 2; Basqa nysandar – 24.«Nurmuhan Jantórın atyndaǵy oblystyq mýzykalyq-dramalyq teatryna barǵanymda, ǵımaratqa kirý qanshalyqty qoljetimdi bolǵanyn kórip qýanyp qaldym jáne jaqynda qalamyzdaǵy eń úlken sýpermarket – «Dınadan» saýda jasadym, onda kóp taýar alýǵa óte yńǵaıly boldy, kirip-shyǵýǵa jaǵdaı jasalǵan, taktıldi plıtalar, múgedekterge arnalǵan kórsetkishter bar. Men árdaıym bizge jasalǵan jaǵdaılarǵa nazar aýdaramyn. Bul – qala turǵyndary, sonyń ishinde biz úshin de eń jıi baratyn oryndar», dep ekinshi toptaǵy múgedektigi bar Islam Atakıshıev oıymen bólisti.
Budan bólek, oblys boıynsha Halyqty áleýmettik qorǵaý salasyndaǵy retteý jáne baqylaý komıtetiniń departamenti tarapynan 2025 jyldyń basynan beri 7 profılaktıkalyq jáne 15 jospardan tys tekserý júrgizildi. Nátıjesinde 6 nusqama berilip, 6 nysan ákimshilik jaýapkershilikke tartyldy. Aıta ketý kerek, buzýshylyqtar alǵash ret anyqtalǵan jaǵdaıda tek nusqama berilip, eger ol ýaqytyly oryndalmasa, aıyppul salynady.
2025 jyldyń sońyna deıin Mańǵystaý oblysynda taǵy 368 nysandy beıimdeý josparlanǵan.