ASTANA. 19 naýryz. Sankt-Peterbýrgtyń «Zenıt» fýtbol komandasynyń bas jattyqtyrýshysy Andre Vıllash-Boash Reseı chempıonatyn meksıkalyq serıaldarǵa teńedi. Bul jóninde championat.com habarlady.
Búgin túnde Eýropa lıgasy aıasynda «Zenıt» Italııanyń «Torıno» komandasymen qarymta oıyn ótkizedi. Soǵan baılanysty Reseı komandasy Italııaǵa bardy. Ol jerde Vıllash-Boash tilshilermen kezdesip, arnaıy baspasóz-máslıhatyn ótkizdi. Jıyn barysynda tilshilerdiń biri Reseı chempıonatyndaǵy sońǵy kezderi bolyp jatqan keleńsizdikterge toqtalyp, jattyqtyrýshydan sol týraly aıtyp berýin ótindi. Ásirese, ıtalııalyq tilshilerdi SSKA men Týlanyń «Arsenaly» arasyndaǵy daýly oqıǵa qyzyqtyrdy.
О́z kezeginde portýgalııalyq maman «Bul másele jaıynda naqty bir nárse aıtý qıyn. Degenmen, «Arsenal» óz kózqarasyn ózgertedi dep senemin. Sebebi, bul jaǵdaı Reseı chempıonatynyń bedeline nuqsan keltiredi. Negizi sońǵy kezderi mundaı jaıttar jıilep barady. «Arsenal» úıdegi oıyndaryn Máskeýde ótkizse, «Torpedo» da ózine kelgen qonaq komandany «Spartaktyń» alańynda qabyldaıtyn boldy. Áıteýir Reseı fýtbolynda bitpeıtin ııý-qııý dúnıeler kóp. Sondyqtan men Reseı chempıonatyn Meksıka serıaldaryna teńer edim», dedi Vıllash-Boash myrza.
Aıta keteıik, Reseı chempıonatynyń aldaǵy 20-týrynda Týlanyń «Arsenaly» óz alańynda Máskeýdiń SSKA-syn qabyldaýy tıis. Alaıda, SSKA oıynshylary Týladaǵy stadıonnyń sapasyna kóńilderi tolmaıtynyn aıtyp, basqa alańda oınaǵysy keletini týraly tıisti oryndarǵa aryzdanady. Olardyń baqytyna oraı, Reseı fýtbolynyń basshylary bul usynysty qanaǵattandyryp, oıyndy Máskeýdegi «Lokomotıv» komandasynyń kishi sport arenasynda ótkizý týraly sheshim shyǵardy.
Mundaı sheshimge qarsy bolǵan «Arsenaldyń» bas jattyqtyrýshysy Dmıtrıı Alenıchev 21 naýryzda bolatyn oıynǵa komandasynyń qosalqy quramyn shyǵaratynyn aıtty. «Biz match bolatyn kúnge deıin alańnyń sapasyn jaqsartýǵa ýáde berdik. Biraq, sózimizge qulaq asqan eshkim joq. Sondyqtan qarsylyq retinde osyndaı áreketke barýǵa májbúrmiz», deıdi Alenıchev myrza. Bas jattyqtyrýshynyń bul bastamasyn «Arsenal» jankúıerleri de qoldady. Desek te, bul úshin Reseı fýtbol odaǵy Týlanyń komandasyna eshqandaı qarsy shara qoldana almaıdy. Sebebi, qosalqy quram oınamaýy kerek degen ereje joq. Al Reseıdiń Sport mınıstri Vıtalıı Mýtko: «Arsenaldyń» tek qosalqy qurammen oınaýǵa quqy joq», dep bul jaıtqa qarsy ekenin bildirdi.
Qazir fýtboldan Reseı premer-lıgasynyń ekinshi kezeńi ótýde. Qys boıy demalǵan komandalar kóktem shyǵa qaıtadan talasty bastap ketti. Márege jaqyndaǵan saıyn chempıondyqtan úmitker komandalar san túrli aıla-tásilge barýda. Jankúıerler SSKA-nyń bul áreketin sondaı qıturqy amaldardyń biri dep sanaıdy.
Elaman Qońyr.
Derek: championat.com.
Sýret: sports.ru, lenta.ru.