Bala tolyq jáne úılesimdi damýy úshin ol otbasy aıasynda, baqyt pen mahabbat, túsinýshilik jaǵdaıynda ósýi qajet. Elimizdegi «Neke-otbasy» zańnamasy balalardyń otbasynda tárbıelený basymdyǵy, olardyń ósip-jetilýi men ál-aýqatty bolýyna qamqorlyq kórsetý qaǵıdattaryna negizdelgen. Búginde Jambyl oblysy ákiminiń qoldaýymen óńirde jetim balalar men ata-anasynyń qamqorlyǵynsyz qalǵan balalardy otbasylyq jaǵdaıda tárbıeleý boıynsha mańyzdy sharalar qabyldanyp júrgizilýde.
Atap aıtqanda, ústimizdegi jyldyń 6 aıynda jańadan 10 otbasylyq úlgidegi balalar úıleri ashyldy. Oblysta 2014 jyly eki ǵana otbasylyq úlgidegi balalar úıleri bar bolatyn, Erjanovtar jáne Tımofeevter otbasy úlgisindegi balalar úılerinde 9 kámeletke tolmaǵan balalar tárbıelense, jańadan ashylǵan 10 otbasy úlgisindegi balalar úılerinde 55 bala tárbıelenýde. Otbasy úlgisindegi balalar úılerin damytýǵa 2014 jyly 5 mln. 954 myń teńge bólinse, 2015 jyly 25 mln. 309 myń teńge qaralyp otyr. Sonymen qatar, oblysta jetim jáne ata-anasynyń qamqorlyǵynsyz qalǵan balalardy patronattyq tárbıege berý úrdisi damyp keledi. 2012 jyly – 1577 bala patronattyq tárbıege berilse, 2013 jyly – 1732 bala, 2014 jyly – 1759 bala, 2015 jyly – 1689 bala berildi. Jetim balalar men ata-anasynyń qamqorlyǵynsyz qalǵan balalardy ornalastyrýdyń otbasylyq nysandaryn nasıhattaýdy kózdeıtin «Rızashylyq», «Qýan, sábı», «Qamqorshy kúni» respýblıkalyq qaıyrymdylyq merekeleri men «Otbasyna barar jol» aksııasy aıasynda uıymdastyrylǵan is-sharalar nátıjesinde jetim balalardy otbasynda tárbıeleýge alǵysy keletin otbasylardyń sany edáýir artty. 2014 jyly balalar úılerinen bala asyrap alýǵa úmitkerler retinde 235 otbasy tirkelse, bıylǵy jyldyń 6 aıynda 95 otbasy nıettenip otyr. 2014 jyly oblystaǵy balalar úılerinen 42 balany qazaqstandyq azamattar asyrap alyp, 60 balaǵa qorǵanshylyq pen qamqorshylyq belgilendi, 11 bala patronattyq tárbıege berildi, 50 bala týǵan otbasyna oraldy. Jetim balalar men ata-analarynyń qamqorlyǵynsyz qalǵan balalarǵa arnalǵan uıymdardy kezeń-kezeńmen qysqartý – osy sanattaǵy balalardy áleýmettik beıimdeý úshin qajetti shara. 2011 jyly oblysta jetim jáne ata-anasynyń qamqorlyǵynsyz qalǵan balalarǵa arnalǵan 5 ınternattyq mekemelerde jáne 3 otbasy úlgisindegi balalar úılerinde 588 bala tárbıelense, 2012 jyly «Ulan» balalar úıin jáne 2015 jyly V. Savva atyndaǵy jetim jáne ata-anasynyń qamqorlyǵynsyz qalǵan balalarǵa arnalǵan mektep-ınternatyn Q. Sarymoldaev atyndaǵy balalar úıine qosý arqyly 2 birlikke qysqartylyp, onda tárbıelenip jatqan balalar sany 2011 jylǵy 588-den 370-ke, ıaǵnı 218-ge kemidi. Sondaı-aq, oblysta jetim jáne ata-anasynyń qamqorlyǵynsyz qalǵan balalardy turǵyn úımen qamtamasyz etý boıynsha nátıjeli jumystar júrgizilýde. 2014 jyly memlekettik turǵyn úı qorynan 157 bala turǵyn úımen qamtamasyz etildi. Búgingi kúni jalpy oblys boıynsha 363 jetim jáne ata-anasynyń qamqorlyǵynsyz qalǵan bala turǵyn úımen qamtamasyz etilgen.
Sulýshash QURMANBEKOVA, Jambyl oblystyq bilim basqarmasynyń basshysy.
Jambyl oblysy.