Jambyl oblysynyń ákimi Erbol Qarashókeevtiń tóraǵalyǵymen ótken apparattyq keńeste halyqty jumyspen qamtý jáne ataýly áleýmettik kómek (AÁK) kórsetý boıynsha 2025 jyldyń birinshi jartyjyldyǵynda atqarylǵan jumystar saralandy, dep habarlaıdy Egemen.kz.
Jumyspen qamtýdy úılestirý jáne áleýmettik baǵdarlamalar basqarmasynyń basshysy Erkin Kelesovtiń aıtýynsha, bıyl óńirde 65 647 jumys ornyn qurý kózdelse, búginge kúnge deıin 25 918 adam eńbekpen qamtyldy.
Jyl basynan beri 28 912 adam jumyspen qamtýdyń belsendi sharalaryna tartyldy (jyldyq jospar – 58 442 adam).
Jumys berýshiler usynǵan jáne sýbsıdııalanatyn jumys oryndaryna 22 753 adam joldandy, onyń 8 330-y turaqty jumysqa ornalasty.
Memleket basshysynyń «Árbir 10 myń turǵynǵa 100 jańa jumys ornyn ashý» týraly tapsyrmasyna sáıkes 2 222 jumys orny ashyldy. Jyl sońyna deıin taǵy 10 312 adamǵa arnalǵan jumys orny qurylady dep kútilýde.
Oblys boıynsha 98 joba elektrondy eńbek bırjasyna engizilip, 442 azamat jumysqa ornalasty.
Búginde 501 adamǵa qaıtarymsyz grant berildi. Olardyń qatarynda: 309 kópbalaly ana, 108 múmkindigi shekteýli azamat, 46 múgedek bala tárbıeleýshi, 26 asyraýshysynan aıyrylǵan jan, 10 AÁK alýshy jáne 2 qandas bar.
2025 jyldyń sońyna deıin taǵy 500-den asa adamnyń kásipkerlik bastamasyna qoldaý kórsetý kózdelip otyr.
Qysqa merzimdi kásiptik oqýmen 1 315 azamatty qamtý josparlanǵan, búginde 579 adam oqýǵa tartyldy.
2025 jyldyń 1 shildesindegi málimetke sáıkes 3 408 otbasyndaǵy 18 705 adamǵa ataýly áleýmettik kómek taǵaıyndaldy. Bıylǵy alty aıda AÁK alýshylar sany ótken jyldyń osy kezeńimen salystyrǵanda 8 933 adamǵa azaıǵan.
Sonymen birge AÁK alýshy otbasylardaǵy 1-6 jas aralyǵyndaǵy 5 848 balaǵa aı saıynǵy tólemder júrgizildi.
Basqarma basshysynyń aıtýynsha, ishinara zerdeleý barysynda 96 otbasyǵa AÁK zań talaptaryn buza otyryp taǵaıyndalǵany belgili boldy.
Oblys ákimi jumyssyz azamattarǵa naqty qoldaý kórsetýdiń, eńbek resýrstaryn tıimdi paıdalanýdyń, kásibı oqytýdy júıeli uıymdastyrý men áleýmettik kómek sharalarynyń tıimdiligin arttyrýdyń mańyzdylyǵyn atap ótip, bul baǵyttaǵy jumysty kúsheıtýdi tapsyrdy.
Barlyq deńgeıdegi ákimderdiń negizgi mindeti – halyqtyń ál-aýqatyn arttyrý, jumyssyzdyqty azaıtý, kásipkerlikpen aınalysýyna jan-jaqty qoldaý kórsetý. Ásirese, eńbekke qabiletti azamattardy jumyspen qamtý arqyly olardyń tabysyn arttyryp, memleketke táýeldiligin azaıtýymyz qajet. – Jastardy jumyspen qamtýǵa basa nazar aýdarý kerek. Olar jumys izdep, ár qalada sabylyp júrýge tıis emes, – dedi óz sózinde.
Erbol Qarashókeev qoǵamdyq jumystarǵa bólinetin kvota sanyn arttyrýdy, sondaı-aq qaıtarymsyz granttardyń maqsatty jumsalýyn turaqty zerdeleýdi talap etti.
Ataýly áleýmettik kómek shyn muqtajǵa berilýi qajet. Memleket qarajatynyń maqsatty ári tıimdi jumsalýy – basty talaptardyń biri, – degen óńir basshysy AÁK taǵaıyndaýǵa jaýapty mamandardyń jaýapkershiligin kúsheıtip, olardy arnaıy oqytýdy mindettedi.
Basqosýda kórsetkishteri tómen qalyptasqan Taraz qalasy men Jambyl, Moıynqum, Shý, Qordaı aýdany ákimderiniń esebi tyńdaldy.