«Astana EKSPO-2017» halyqaralyq mamandandyrylǵan kórmesi nysandarynyń qurylysyna búgingi kúni 101 qazaqstandyq kásiporyn tartylǵan. Jasalǵan kelisimsharttardyń jalpy somasy 88 mlrd. teńgeni qurap otyr.
Elbasynyń kórme qurylysyna jáne ony daıyndaý isine aımaqtyq bıznesti tartý jónindegi tapsyrmasyn oryndaý aıasynda «Astana EKSPO-2017» Ulttyq kompanııasy taýarlar, jumystar men qyzmetterdi jetkizetin otandyq kásiporyndarmen yntymaqtastyqty keshendi óristetýde. Qazirgi kúni Qaraǵandy, Qyzylorda, Soltústik Qazaqstan, Pavlodar, Shyǵys Qazaqstan, Jambyl oblystarynyń ákimdikterimen jáne Astana qalasynyń ákimdigimen birqatar memorandýmdarǵa qol qoıylǵan. Osy memorandýmdar sheńberinde júrgizilgen jumystardyń qorytyndysy boıynsha, 83 kásiporynmen 87 mlrd. teńge jumys kólemi jónindegi kelisimsharttarǵa qol qoıyldy. Olardyń ishinde 65 kompanııa Astanadan (irgetastyń qazyqtary, beton, qıyrshyq tas, qurylysqa arnalǵan eritindiler, ankerlik burandamalar, aǵashtan jasalǵan qalyp, gaz bloktary, dızeldik otyn, hımııalyq qospalar, sendvıch-panelder, sorǵysh jabdyq jáne t.b.), 1 kompanııa Soltústik Qazaqstan oblysynan (metall qurylmalary, montaj), 12 kompanııa Qaraǵandy oblysynan (metall buıymy, metall quramalaryn shyǵarý, temirbetondy buıymdar, irgetastyń qazyqtary, arnaýly jumys kıimi, radıatorlar, qubyrlar jáne polıpropılennen jasalǵan fıtıngter), 2 kompanııa Pavlodar oblysynan (metall buıymy (armatýra), kabeldik ónim), 2 kásiporyn Ońtústik Qazaqstan oblysynan (transformatorlyq jabdyqty shyǵarý jáne jetkizý) jáne 1 kompanııa Shyǵys Qazaqstan oblysynan (mıneralmaqtalyq taqtaılar) qatysyp otyr.
EKSPO-2017 nysandarynyń qurylysyna qatysyp otyrǵan 101 kásiporynnyń ishindegi 18 kásiporyn memorandýmdar aıasynan tys kelisimsharttar boıynsha jumysqa tartylǵan. Olardyń ishindegi 13 kompanııa Aqmola oblysynan (bıtýmdyq emýlsııa, ınerttik materıaldar, gaz bloktary, penopolıstırol, metaldan jasalǵan buıymdar jáne irgetastyń qazyqtary) jáne 5-ýi Almatydan (shynypaket, qorshaýǵa arnalǵan vıtrajdyq qurylmalar, bentolaınermen jasalǵan sý ótkizbeıtin materıal, aýany syrtqa jáne ishke tartatyn jeldetkishterge arnalǵan jabdyq, irgetas qazyqtary) qatysýda. EKSPO-2017 nysandarynyń qurylysyna qatysýshy otandyq kásiporyndardyń ishinde Qaraǵandynyń «Imstalkon» zaýytyn erekshe atap ótken jón. «Imstalkon Qaraǵandy metall qurylymy zaýyty» JShS kez kelgen kúrdelilik jaǵynan iri gabarıtti qurylymdardy daıyndaý boıynsha elimizdegi kóshbasshy bolyp tabylady. Kásiporyn metall qurylymdy, sonyń ishinde jeke jobalar boıynsha ónimder jasaı otyryp, ishki naryq qajettilikterin qamtamasyz etedi. «Qazirgi ýaqytta zaýyttyń jylyna 30-35 myń tonna metall konstrýksııalaryn shyǵarýǵa múmkindigi bar. Aı saıynǵy kólem 3 000 tonna metall qurylymdy quraıdy. Bizdiń ózimizdiń qurylymdyq bólimimiz bar. О́nimniń jeke túrleri boıynsha bizdiń zaýyt Qazaqstandaǵy jalǵyz óndirýshi. Negizinen, bul – aspaly kópir qurylymdary», – deıdi «Imstalkon Qaraǵandy metall qurylymy zaýyty» JShS bas dırektory Nur Nurǵalıev.
Jaras SÁDÝAQASOV.