Tıan-Shannyń bir shyńy «Qazaqstan halqy Assambleıasy» ataýyna ıe bolady

Jaqynda Saıram-О́gem memlekettik ulttyq parkinde «Bul – bizdiń taýlar» dep atalatyn festıval ótti. Bizdiń taýlar dep keýdeni maqtanysh kerip, aýyz toltyryp aıtatyndaı bar. Joǵaryda aspanmen aman­dasqan, basyn sireý muz basqan, qary erimeıtin alyp taý, etegi ıt tumsyǵy batpas qalyń ný, kókke órlegen qaraǵaı, ishki saraıyńdy ashqan arsha, taýdan qulap aqqan, jolyndaǵyny jańqadaı julyp áketetin aryndy ózen, tamyljyǵan tabıǵat osylaı degizedi. Teńiz deńgeıinen 1500 metr­deı bıiktegi alańqaıda Qazaqstan halqy Assambleıasynyń 20 jyldyǵyna arnalǵan saltanatty jıyn ótti. Is-sharany uıymdastyrý jumystaryna Ońtústik Qazaqstan oblysynyń ákimdigi, Ońtústik Qazaqstan oblystyq Qazaqstan halqy As­sam­bleıasy, Ońtústik Qazaqstan oblysy kásipkerlik, ındýs­trııalyq-ınnovasııalyq damý jáne týrızm basqarmasy, «Nur Otan» partııasynyń «Jas otan» jastar qanaty, Tóle ­bı aýdandyq ákimdigi, Saı­ram-О́gem memlekettik ult­tyq tabıǵı parki, oblys ákimi ja­nyn­daǵy sporttyq-ekologııalyq tý­rızmdi damytý jáne eko­lo­gııalyq tárbıe jónindegi qoǵamdyq keńesi qatysty. Saıram-О́gem shatqalynyń shyǵys jaǵynda bıiktigi 3535 metr, adam aıaǵy baspaǵan shyń bar. Osy shyńǵa tájirıbeli taý nusqaýshysy Shamıl Rafıkov bastaǵan alpınıster shyǵyp, elimizdiń Kók baıraǵy men As­sambleıa týyn tigip, ataý bermek. Saltanatty jıynda Par­lament Májilisiniń depýtaty Rozaqul Halmuradov sóz sóıledi. Qazaq jeriniń tutastyǵy, el táýelsizdigi úshin kúresken Abylaı hannyń dúnıeden óter kezdegi aıtqan armandaryn ataı kelip, búginde sonyń bári Elbasynyń syndarly saıasaty arqasynda múmkin bolǵandyǵyn, Qazaqstannyń álemdik saıasatta orny erek ornyqty memleket ekendigin atap ótti. Osynyń bári Qazaqstan halqynyń bir úıdiń balasyndaı, bir qoldyń sala­syndaı tatýlyǵynyń arqasynda júzege asqandyǵyn aıta kelip, jańa shyńdy baǵyn­dyrýshylarǵa sát sapar tiledi. Oblys ákiminiń orynbasary Erlan Aıtahanov bıylǵy jyly memlekettik deńgeıde atalyp ótetin merekelerdiń mánin tarqatyp, Qazaqstan hal­qy Assambleıasy jylyna laıyqty tartý jasamaqqa bekingen erikti topqa sáttilik tiledi. Alpınıst Vıktorııa Vorobeva shyń­dy baǵyndyrý ońaı sharýa emes­tigin, biraq, Qazaqstan halqynyń tutastyǵynyń merekeli jylyna laıyqta tartý jasaǵylary keletindikterin ortaǵa saldy. Al top jetekshisi, taý nusqaýshysy Shamıl Rafıkov: «Shyńǵa qaraı qıyn da aýyr joldarmen júremiz. «Sazan ata» shatqalyn boılaı otyryp, keshke qaraı úlken jazyqqa jetip, sonda túneıtin bolamyz. Buıyrtsa, erteń tańerteń jolǵa shyǵyp, shyńǵa jetemiz dep oılaımyn. Elimizdegi turaqtylyqtyń sımvoly bolǵan shyńdy baǵyndyrý – men úshin úlken baqyt», – dedi. Kásipqoı fotograf Bogdan Rýdenko shyńǵa órmelegende jeńil júktiń ózi aýyr bolatyndyǵyn, son­dyqtan meılinshe júkti azaıtqandaryn, biraq fotoapparatyn mindetti túrde alyp shyǵa­ty­nyn aıtqan. О́ıtkeni, adam izi baspaǵan, tabıǵattyń qaıtalanbas sátterin, jeńisti joryqty bastan-aıaq tarıh paraǵyna jazý úshin sátti túsirimder kerek-aq. Qyzyq bolǵanda, taý shyńyn baǵyndyrmaq bolǵan 20 alpınısten bólek, taý shatqaldarynda qar barysyndaı júrip júrgen 12 erikti birge barmaqqa usynys bildirdi. Alpınıster shyńdy baǵyn­dyrýǵa attanyp ketken kúni shatqalda qalǵan topta sýret­shiler konkýrsyna qatysýshy­lar­dyń pleneri ótti. Eki kúnniń qory­tyndysynda oblystaǵy Á.Qasteev atyndaǵy kolledjdiń oqytýshysy Qarlyǵash Qanseıitova birinshi oryndy jeńip aldy. Týrıster alaý basyna jı­nal­ǵanda keshqurym Tóle bı aýdany etnomádenı ortalyqtarynyń ókil­deri kelip, konsert berdi. Lager komendanty, «Bul – bizdiń taýlar» festıvaliniń uıymdastyrýshysy ári rýhanı dem berýshisi, ózimizdiń syralǵy dosymyz Keńes Ismaılov taý baýraıynda ótken eki kúndik is-sharanyń oıdaǵydaı ótýine úlken eńbek sińirdi. Taý shyńyn baǵyndyrǵandar jeksenbi kúni etekke tústi. Bári din aman, kóńil-kúıleri kóterińki. Top jetekshileri Shamıl Rafıkov, Vıktorııa Vorobeva jáne Erbol Orazalınniń baıandaýynsha táji­rıbeli alpınısterden bólek, eriktiler de jańa taý shyńyna oıdaǵydaı shyqqan. Oblys ákiminiń orynbasary Erlan Aıtahanov shyńdy ba­ǵyn­dyrǵandarǵa ob­lys ákiminiń atynan arnaý­ly dıplomdar tapsyrdy. Endi Saı­ram-О́gem shatqalyndaǵy jańa shyń ataýy oblystyq onamastıka ko­mıs­sııa­synyń qaraýyna usynys retinde beriledi. Oblystyq Assambleıa hatshy­ly­­ǵynyń meńgerýshisi Muratáli Qal­muratov: «Sóz ben istiń birligin qatar ustaǵan abzal. Elimizdegi yntymaqty sózben ǵana aıtyp qoıý jetkiliksiz, elińniń jetistigine súıispenshilikti ispen dáleldeý kerek. Shyń basyna shyqqandar osy mereıli mindetpen qatar, ishki týrızmniń múmkindigin ashýǵa ól­sheýsiz eńbek sińirdi», – dedi. Saıram-О́gemdeı jer jánna­tynda ataýsyz qalǵan jalǵyz shyń ógeısip turar edi. Endi ol Qazaqstan halqy birliginiń sımvolyna aınaldy. Baqtııar TAIJAN, «Egemen Qazaqstan». Ońtústik Qazaqstan oblysy. ––––––––––––– Sýretterdi túsirgen Qaısar ShERIM.