Mılannan Astanaǵa deıin: fransýz velosıpedshisi EKSPO astanalaryn aralady

Burnaǵy kúni «Astana EKSPO-2017» UK» AQ atsalysýymen Qazaqstandaǵy Fransııa elshiligi Alstom kompanııasymen birlese otyryp, «SunTrip – From Expo to Expo» ımıdjdik velo­jarysynyń qatysýshysy Paý­lınde la Marnemen salta­natty kezdesý rásimin uıym­dastyrdy. Fransýz velosı­pedshisi EKSPO-nyń úsh astanasy – Mılan (2015), Antalıa (2016) jáne Asta­naǵa (2017) saıahat jasady.

Paýlın 9 myń shaqyrymdyq joldy júrip ótip, «Báıterek» monýmenti janyndaǵy alańǵa velosıpedimen jetti. Saltanatty kezdesýdi Fransııanyń Qazaq­standaǵy Tótenshe jáne ókiletti elshisi Fransıs Eten sálemdesý sózimen bastady.

Bul saıahattyń maqsaty Eýropa men Qazaqstan arasyn­daǵy ja­qyndyqty kórsetý. Sony­men qatar, Paýlınniń velosı­pedi kún energııasy kóme­gi­men qozǵa­la­tyndyqtan, velo­jarys «taza» energııa ıdeıasyn ilgeriletýdi kózdeıdi. Mundaı velosıpedpen kúnine shamamen 200 shaqyrym joldy saǵatyna 40-60 shaqyrym jyldamdyqpen júrip ótýge bo­lady. Fransýz qyzynyń sózi­ne súıensek, eń bastysy, velo­sıpedshi tózimdi bolýy kerek. «Siz tabıǵatqa jáne energııa kózderine uqypty qaraýdyń jarqyn úlgisin kórsettińiz. «Bolashaq energııasy» taqyry­byna arnalǵan Astanadaǵy EKSPO-2017 kórmesin ótkizý qar­­sań­ynda bul másele óte ózekti», – dedi óz sózinde «Astana EKSPO-­2017» UK keńesshisi Roza Asan­baeva. Qazirgi tańda ulttyq kompanııa elordanyń týrıstik jol­baǵ­daryn jetildirý jáne «RecommendedbyEXPO» belgisi qoı­ylǵan týrısterge arnalǵan eń úzdik baǵyttardyń tizimin qu­rý boıynsha jumys júrgizýde. So­lar­dyń biri «Túngi Astana shyraq­tary» saıahattyq baǵdary Paý­lınge syılyq retinde tabys­taldy. Qaısar velosıpedshi jınal­ǵan­darǵa alǵysyn bildirip, Qazaq­stannyń elordasy óte sulý ekendigin atap ótti. Ol «mindetti túrde EKSPO-2017 kórmesine kelemin» dep ýáde berdi. «Meniń saıahatymnyń maqsaty – kez kelgen adam tabıǵatty búldirmesten elderdi aralaı alatynyn kórsetý. Sondaı-aq, tehnıkalyq ınnovasııalardy «garajda» otyryp-aq óz qolyńmen jasaýǵa bolatynyn kórsetýge baǵyttaldy», – dedi Paýlın. Aıta keteıik, «Sun Trip» jobasy 2013 jyly ekologııalyq kólik túrlerin ilgeriletýge baǵyttalǵan tyń bastama retinde iske qosyldy. Sonyń sheńberindegi velojarys barysynda birneshe ondaǵan adam kún energııasymen júretin velosıpedpen álemdi sharlaý­da. Jol-jónekeı sportshylar ártúrli qalalarda aıańdap, jergilikti halyqpen tildesip, «taza» energetıkanyń dáýiri bastalǵanyn óziniń isi arqyly úlgi retinde nasıhattap kórsetedi. Bıylǵy jarysqa kóptegen adam qatysyp, Mılannan Antalıaǵa qaraı saıahatqa shyqty. Alaıda, Antalıadan Astanaǵa deıin jetýge tek Paýlın ǵana bel býǵan kórinedi.

Elaman QOŃYR, «Egemen Qazaqstan».