Qazaq tankısteri «Tank bıatlony» jarysynyń bastapqy kezeńin sátti aıaqtady. Jalpy uzyndyǵy 21 shaqyrymdy quraıtyn úsh aınalymdy 26 mınýt 7 sekýndta júrip ótken olar 13 eldiń tankısteriniń aldyna shyqty. Osylaısha, qazaqstandyqtar jeke jarysta eń úzdik nátıjege qol jetkizdi.
Erekshe atap óterligi, birinshi qazaqstandyq tank ekıpajyn quramynda baǵyttaýshy-operator serjant Erasyl Jumaǵulov pen mehanık serjant Dýman Baıjanov bar leıtenant Asylbek Musyrmanqulov basqardy. Árıne, mundaı nátıjege qol jetkizý, qatysýshy elder tankısterin artta qaldyrý ekıpaj músheleriniń áskerı mindetti múltiksiz oryndaýǵa degen jaýapkershiliginde jáne árqaısysynyń óz isine berilgendiginde jatyr. «Bizdiń ekıpaj qozǵalǵannan bastap, ara qashyqtyqty baǵyndyrýda erkin boldy. Biz jarys barysynda sabyrlylyq saqtadyq jáne de bar kúsh-jigerimizdi jumyldyra bildik. Árqaısymyz óz mindetimizdi jaqsy túsinip, ne isteý kerektigin bildik jáne sol mindetterimizdi múltiksiz oryndap shyqtyq», – dedi ekıpaj komandıri Asylbek Musyrmanqulov. Qazaqstandyq tankısterdiń qol jetkizgen jetistikteri «Tank bıatlony» jarysynyń kelesi kezeńinde de jalǵasyn tabady degenge senim mol. Deıturǵanmen, mejege jetý jolynda synaqtyń kúrdeli ekendigin de qaperden shyǵarmaǵan jón. «Egemen-aqparat».