Úkimette Premer-mınıstrdiń orynbasary Ermek Kósherbaevtyń qatysýymen Prezıdenttiń áleýmettik saladaǵy tapsyrmalaryn oryndaý máseleleri boıynsha baspasóz konferensııasy ótti. Ol áleýmettik saıasat degenimiz tek bıýdjet shyǵyndarynyń ósý kólemi emes, adamı kapıtalǵa, halyqtyń densaýlyǵyna, jastardyń bilimine, qoǵamnyń turaqtylyǵyna baǵyttalǵan ınvestısııalar ekenin atap ótti.
«Memleket basshysy Úkimet aldyna ómir sapasyn jaqsartý, halyqtyń áljýaz toptaryn qorǵaý jáne áleýmettik ınfraqurylymdy qalyptastyrý jóninde tapsyrmalar bergen bolatyn. Bul baǵytta keshendi jumys atqarylyp jatyr. Búginde memleket óziniń áleýmettik mindettemelerin tolyq oryndaýda. Bıýdjettiń jartysynan kóbi osy salaǵa jumsalady. Sonyń ishinde birneshe sanatqa toqtala ketsem. Jyl basynan beri 1,2 mln balasy bar otbasynyń járdemaqylary 6,5%-ǵa artty. Oǵan respýblıkalyq bıýdjetten 870 mlrd tenge bólindi. Ol 2024 jylmen salystyrǵanda shamamen 17%-ǵa kóp», dedi Ermek Kósherbaev.
Vıse-premerdiń aıtýynsha, ataýly áleýmettik kómek 245 myń adamǵa 16,2 mlrd teńge kóleminde tólenip jatyr. Memleket basshysy múmkindigi shekteýli jáne qart adamdardy qoldaýǵa Úkimettiń aldyna erekshe nazar bólý týraly mindet qoıǵan bolatyn. Jyl basynan beri zeınetaqy tólemderi 8,5%-ǵa arttyryldy. Zeınetaqynyń ortasha mólsheri 180 myń teńgeni quraıdy. Bul maqsatqa 4 trln teńge jumsalýda.
«Jalaqyny arttyrý – halyqty kóp tolǵandyratyn másele. Elimizdegi ortasha jalaqy mólsheri ósip, qazir 423 myń teńgeni quraıdy. Eń tómengi jalaqy mólsheriniń ósýi 600 myń azamattyq qyzmetshiniń eńbekaqysynyń ósýine yqpal etti. Jarty jyldyń qorytyndysy boıynsha 250 myń adam jumyspen qamtyldy. Bul baǵytta sıfrlyq platforma engizilýde. Negizgi maqsat – naqty kómekke muqtaj otbasylardy qoldaý. Bul Memleket basshysynyń tikeleı tapsyrmasy», dedi Premer-mınıstrdiń orynbasary.
Vıse-premer óńirlerde zamanaýı aýrýhanalardyń qurylysy jáne medısınalyq mekemelerdi jańǵyrtý jumystary júrgizilip jatqanyn atap ótti. Jyl saıyn ana men bala ólimi tómendep, dári-dármekpen qamtamasyz etý jaqsaryp keledi.
«Prezıdenttiń «Aýyldyq densaýlyq saqtaýdy jańǵyrtý» ulttyq jobasy tapsyrmasyna sáıkes 500-den astam nysannyń qurylysy aıaqtaldy. Jyl sońyna deıin taǵy 140-tan astam aýyldyq ambýlatorııa men medısınalyq pýnktter iske qosylady. О́ńirlerge sapar barysynda osy nysandardyń qurylys barysymen, sondaı-aq olardyń medısınalyq kadrlarmen qamtamasyz etilýimen tanysqanymdy atap ótkim keledi. Jalpy, ulttyq jobanyń nátıjesinde aýyldaǵy medısınalyq kómektiń qoljetimdiligi artyp keledi», dedi Ermek Kósherbaev.
Ol sondaı-aq keıingi ýaqytta dárigerler men medbıkelerge qatysty zorlyq-zombylyq jaǵdaılary olardyń kásibı mindetterin oryndaý kezinde jıilep ketkenin aıtty. Qazir Memleket basshysynyń tapsyrmasy boıynsha depýtattyq korpýspen birlesip osyndaı áreketter úshin qylmystyq jaýaptylyqty qatańdatý boıynsha zańnamalyq túzetýler paketi ázirlendi.
Sonymen qatar vıse-premer jyl basynan beri elimiz boıynsha 13 myń oryndyq 172 balabaqsha ashylǵanyn habarlady. Sonyń nátıjesinde balabaqshaǵa kezek azaıǵan. Memleket basshysynyń tapsyrmasyna sáıkes 1,7 mln oqýshy tegin ystyq tamaq ishedi. Olardyń ishinde áleýmettik osal toptardan 99 myń bala bar. Olardy qoldaýǵa 18,4 mlrd teńge bólindi. Tamaqtanýdyń jańa standarty engizildi: kókónister kóp, qant az, zııandy taǵamdar alynyp tastaldy. «Ulttyq qor – balalarǵa» baǵdarlamasy boıynsha 6,8 mln balaǵa aqshalaı qarajat aýdaryldy. Olar ony bolashaqta bilim men turǵyn úıge paıdalana alady. Mektepterdiń qurylysy men qaıta jańǵyrtý jumystary jalǵasýda. keıingi eki jylda 388 myń oryndyq 274 jańa mektep ashyldy. Onyń ishinde «Jaıly mektep» ulttyq jobasy aıasynda 115 mektep bar. Taǵy 177 mekteptiń qurylysy júrip jatyr.
«Prezıdenttiń nusqaýyna sáıkes 245 mektepti keshendi jańartý júrgizilýde. Bul jalpy bilim beretin mektepterdiń standarttaryn jaıly mektepterge jaqyndatýǵa múmkindik beredi. Nátıjesinde, 95 myńnan astam oqýshynyń oqý jaǵdaıy jaqsarýda», dedi Ermek Kósherbaev.
Stýdenttik stıpendııa men kolledjderdi qarjylandyrý eki ese ósti. Bıyl JOO-ǵa túsý úshin magıstratýra men doktorantýrany qosa alǵanda 93 myń grant bólinedi. Jetekshi sheteldik ýnıversıtetterdiń 24 fılıaly ashyldy. Jańa jataqhanalardyń iske qosylýynyń nátıjesinde oryn tapshylyǵy 72%-ǵa qysqardy. Nátıjesinde, qazirgi ýaqytta bul másele sheshilip keledi. Bul jumystar jalǵasyn tabady.
Premer-mınıstrdiń orynbasary bıyl 5 saýyqtyrý ortalyqtary ashylǵanyn aıtty.
«Balalardyń jazǵy demalysy men saýyqtyrýy boıynsha bıyl 10 myńnan astam mektep janyndaǵy lager men 220 qaladan tys jazǵy saýyqtyrý ortalyqtary qyzmet kórsetýde. Nátıjesinde, 3,4 mln balany qamtydyq. О́zim óńirlerge issaparǵa shyqqanda osy lagerlerge arnaıy soǵyp, balalardyń demalý jaǵdaıy men tamaqtanýynyń qaýipsizdigin tekserip júrmin. Bıyl 5 saýyqtyrý ortalyqtary ashyldy. Jyl sońyna deıin qosymsha taǵy 27 ortalyq iske qosylady. Munyń sapasyn arttyrý maqsatynda kelesi jyldan bastap bul qyzmet lısenzııalanady», dedi.
Bıyl – Abaı Qunanbaıulynyń 180 jyldyǵy. Qazir elimizde birqatar is-shara ótkizilýde. Negizgi is-sharalar tamyz-qyrkúıek aılaryna josparlanǵan. Oǵan óńirler úlken daıyndyq jumystaryn júrgizip jatyr. Basty maqsatymyz – Abaıdyń murasyn qurmettep, urpaq sanasyna sińirý. Bul salada zamannyń aǵymyna saı kreatıvti ındýstrııanyń damýyna kóńil bólinýde. О́ńirlerde 16 kreatıvtik ortalyq ashyldy. Olarǵa salyq jeńildikteri engizilgen. Bilim berý baǵdarlamalary iske qosylǵan. Munyń túpki maqsaty – daryndy jastardy izdep, tabý. Olardyń jobalaryn qoldap, ınvestorlardy tartý. Odan soń otandyq kreatıvtik ónimderdi halyqaralyq naryqqa shyǵarý.
Premer-mınıstrdiń orynbasary Ermek Kósherbaev 5,5 myń jas jańa úı alǵanyn atap ótti. «Sondaı-aq jastardy qoldaý maqsatynda da keshendi sharalar júzege asyrylýda. Onyń ishinde negizgi másele – jastardy turǵyn úımen qamtamasyz etý. «Naýryz» jáne «Otaý» turǵyn úı baǵdarlamalaryna bıýdjetten 220 mlrd teńge bólindi. Nátıjesinde, 5,5 myń jas jańa úı aldy», dedi Ermek Kósherbaev.
Sonymen qatar Premer-mınıstrdiń orynbasary bıyl jumysshy jastardy demeý úshin «Naýryz jumysker» bank ónimi iske qosylǵanyn atap ótti. Oblystarda jas mamandarǵa arnalǵan óńirlik ıpotekalyq baǵdarlamalar jastarǵa úlken múmkindik berýde. Úkimet bul jumystardy ári qaraı júıeli túrde jalǵastyrady.