Asa iri mólsherde alaıaqtyq jáne qylmystyq jolmen alynǵan kiristerdi zańdastyrý faktisi boıynsha aıyptalǵan Perızat Qaırat pen onyń anasy Ǵaını Alashbaevaǵa qatysty sot aıaqtaldy. Is boıynsha prokýratýra pikir bildirdi, dep habarlaıdy Egemen.kz.
Esterińizge sala keteıik, sottalýshy Perızat Qaırattyń ótinishi boıynsha sot onyń aıǵaqtary men jeke derekterin jarııa etpeý maqsatynda sot otyrysyn ishinara jabý týraly sheshim qabyldady.
Prokýratýra Qaıratqa – 10 jyl, Alashbaevaǵa – 8 jyl bas bostandyǵynan aıyrý jazasyn taǵaıyndaýdy, sondaı-aq olardyń múlikterin tárkileýdi surady.
Sotta anyqtalǵan derekterge sáıkes, 2021 jyldyń qazanynan 2024 jyldyń qarashasyna deıin Qaırat pen Alashbaeva «Biz Birgemiz Qazaqstan 2030» qaıyrymdylyq qory arqyly muqtaj jandarǵa arnalǵan birneshe baǵyt boıynsha qarajat jınaǵan. Atap aıtqanda:
Balalarǵa arnalǵan ońaltý ortalyǵyn salýǵa – 126,7 mln teńge; Palestına halqyna gýmanıtarlyq kómek kórsetýge – 566,5 mln teńge; Qazaqstandaǵy sý tasqyny zardaptaryn joıýǵa – 2,8 mlrd teńge.«Jınalǵan qarajattyń jalpy somasy 3,5 mlrd teńge quraǵan. Atalǵan qarajat muqtaj jandarǵa arnaldy, alaıda Qaırat pen Alashbaeva urlanǵan aqshalaı qarajatty qoldanystaǵy bıznesti satyp alý jáne sý tasqynynan zardap shekkenderge taýarlardy jetkizýge jalǵan mámileler jasaý jolymen zańdastyrdy. Zańdastyrylǵan aqshaǵa elıtalyq jyljymaıtyn múlik, qymbat kólikter, sándi zattar satyp alynǵan», delingen málimdemede.
Sonymen qatar Qaırat Perızat áleýmettik jelilerde ózin tabysty kásipker retinde kórsetip, BAÁ-ge et ónimderin eksporttaıtyn otbasylyq bıznesi bar ekenin, shetelde joǵary bilim alǵanyn habarlaǵan. Biraq is materıaldaryna sáıkes, onyń joǵary bilimi joq jáne kolledjden shyǵarylǵany anyqtalǵan.
Ǵaını Alashbaeva bul qylmystyq shemaǵa belsendi qatysyp, qyzyna banktik shottaryn bergen jáne qaıyrymdylyq jasaǵan azamattardy adastyrýda kómektesken.
Is boıynsha jábirlenýshi retinde 51 adam tanylǵan. Prokýratýra olardyń atynan 1,5 mlrd teńgege talap aryz berip, ony tolyq kólemde qanaǵattandyrýdy suraǵan.
«Bul qylmystyq is azamattardyń senimine qııanat jasaý aýqymy boıynsha eldegi eń iri isterdiń birine aınaldy jáne qaıyrymdylyqty zańsyz áreketterge búrkemeleý retinde paıdalanatyndardyń barlyǵyna qatań eskertý bolýy kerek», delingen málimdemede.