2024 jyldyń shilde aıynan bastap Qazaqstan Respýblıkasynyń Qylmystyq kodeksine 428-1-bap engizildi, dep habarlaıdy Egemen.kz.
Bul jańa norma qylmystyq-atqarý júıesi mekemelerindegi beınebaqylaý kameralaryn ádeıi búldirgeni nemese isten shyǵarǵany úshin qylmystyq jaýapkershilik qarastyrady.
Atalǵan ózgeris elimizdegi túzeý mekemelerine táýlik boıy beınebaqylaý júıesiniń keńinen engizilýimen jáne osy kameralardy qasaqana zaqymdaý jaǵdaılarynyń jıilep ketýimen tikeleı baılanysty. Beınebaqylaý júıesi mekemelerdegi ahýaldy tolyqtaı qamtyp, sottalǵandar men qylmystyq-atqarý júıesi qyzmetkerleriniń áreketteriniń ashyqtyǵyn qamtamasyz etedi.
Jańa bap kúshine engen alǵashqy jyldyń ózinde-aq 70-ten astam qylmystyq is tirkeldi. Sonyń ishinde 35 sottalǵanǵa qosymsha jaza merzimi belgilenip, olar keltirilgen materıaldyq shyǵyndy azamattyq tártippen óteýge mindetteldi.
Mysaly, Shymkent qalasyndaǵy №55 mekemesinde 13 sottalǵan adam beınebaqylaý júıesin ádeıi isten shyǵarǵany úshin árqaısysy 6 jyldan qosymsha merzimge sottaldy.
Búginde Qazaqstan boıynsha 78 túzeý mekemesinde 43 myńnan astam beınebaqylaý kamerasy jumys isteıdi. Bul júıelerdiń kórsetilimderi naqty ýaqyt rejıminde qylmystyq-atqarý júıesi komıtetine, Ishki ister mınıstrligine jáne prokýratýra organdaryna joldanady. Mundaı tájirıbe:
- adam quqyqtarynyń saqtalýyn baqylaýǵa,
- quqyq buzýshylyqtardy jedel anyqtaýǵa,
- sottalǵandar men mekeme qyzmetkerleri arasynda tártipti arttyrýǵa múmkindik beredi.
QAJ komıtetiniń málimetinshe, 428-1-bap boıynsha quqyqbuzýshylyqtar sany azaıa bastaǵan. Bul ózgeris beınebaqylaý júıesiniń tıimdiligin ǵana kórsetip qoımaı, qymbat qural-jabdyqtardyń saqtalýyna jáne memlekettik bıýdjet qarajatyn únemdeýge de oń áserin tıgizýde.