ALMATY. 5 tamyz. Almatylyqtar dańqty áskerı ushqysh, Keńes Odaǵynyń eki márte Batyry, avıasııa general-maıory Talǵat Bıgeldınovti týǵan kúnine oraı eske aldy. Bul týraly egemen.kz habarlady.
Uly Otan soǵysynyń ardagerleri arasynan batyrdyń zamandasy-syrlasy bolǵan maıdanger Seıtqasym Boranqulov, respýblıkalyq generaldar keńesi tóraǵasynyń orynbasary Mahmut Teleǵusov áskerı ushqyshtyń ótken ómirinen syr shertip, batyrdy eske alý jıynyna ár berdi.
«KezindeTalǵat Bıgeldınov búkil Keńes Odaǵynyń maqtanyshy, abyroıly da dańqty azamaty sanaldy. Odan soń, tipti, TMD memleketteriniń barlyǵy da birdeı oǵan erekshe qurmet kórsetti. Osynyń ózi bizdiń jigerimizdi janıtyn, sezimimizge serpin beretin. Talǵat Bıgeldınov – bizdiń urpaq úshin erliktiń sımvoly. Bizdiń uranymyz! Bizdiń – Altyn qyranymyz!», – dedi eske alý mıtıngisinde sóz alǵan azamat – Almaty qalalyq ishki saıasat basqarmasynyń jetekshisi Sanjar Boqaev.
Batyrdyń qyzy Raıhan Talǵatqyzy: «Men taıaýda ǵana ákem týraly kitap jazyp bitirdim. Qazaq halqy súıikti perzenti, jaýjúrek áskerı ushqysh Talǵat Bıgeldınovtiń maıdandaǵy erligi men beıbit ómirdegi qajyrly eńbegi týraly kóp biledi, tipti, ańyz etip aıtyp ta júredi. Al men bul shyǵarmamda aıaýly ákemniń jeke tulǵa retinde, azamat retinde ózim baıqaǵan bolmysyn, ózim kýá bolǵan qasıetterin aına-qatesiz tizbektep berdim. Onyń erligin ári esimin qurmetteıtin qaýymnyń jaýyngerler jınalatyn saıabaqqa arnaıy kelip, bizben birge Batyrdy eske alǵanyna oraı bildiretin alǵysymyz da sheksiz», – dedi.
Elimizdiń Ánurany shyrqalyp, qazaqstandyq generaldar keńesiniń músheleri men maıdan ardagerleri, Talǵat Bıgeldınovtiń jaqyndary men týystary Máńgilik alaýǵa alqyzyl gúl shoqtaryn qoıdy.
Saltanattyń sońynda Ofıserler úıinde Generaldar keńesiniń demeýshiligimen kınorejısser Lavrentıı Son túsirgen «Kókke kóterilý» atty derekti fılm kórsetildi.
Talǵat Súıinbaı.
Derek, sýret: egemen.kz.