Abaı oblysynda qazaqtyń uly aqyny, oıshyl Abaı Qunanbaıulynyń týǵanyna 180 jyl tolýyna arnalǵan saltanatty is-shara ótti. Mereıtoı barysynda Qazaqstan Prezıdenti Qasym-Jomart Toqaevtyń quttyqtaý hatyn Senat Tóraǵasy Máýlen Áshimbaev oqyp berdi, dep habarlaıdy Abaı oblysy ákimdiginiń baspasóz qyzmeti.
Memleket basshysy quttyqtaýynda Abaıdyń álemdik deńgeıdegi ǵulama ekenine jáne onyń rýhanı murasynyń keler urpaq úshin de ózektiligin saqtaıtynyna nazar aýdardy.
– Abaı – tól mádenıetimizdi damytýǵa ólsheýsiz úles qosqan kemeńger tulǵa, halqymyzdyń sana-sezimin jańǵyrtqan uly aqyn. Ol jańa ádebıetimizdiń negizin qalap, dúnıetanymymyzdyń kókjıegin keńeıtti. О́skeleń urpaqty bilimpaz, eńbekqor, adal azamat bolýǵa shaqyryp, ulttyń jańa sapasyn qalyptastyratyn qasıetterdi dáriptedi. Hákim Abaıdyń mol murasy – qazaq halqynyń ǵana emes, barsha adamzattyń asyl qazynasy. Onyń oı-tolǵamdary men ósıetteriniń ózektiligi eshqashan joǵalmaıdy. Sondyqtan Abaıdy taný jáne tanytý, shyǵarmashylyǵyn tereń zerdeleý – asa mańyzdy, – delingen Prezıdenttiń quttyqtaýynda.
Senat Tóraǵasy óz sózinde Memleket basshysynyń bastamasymen Abaı murasynyń elimizde ǵana emes, halyqaralyq deńgeıde de keńinen nasıhattalyp jatqanyn atap ótti. Onyń aıtýynsha, 10 tamyzdyń resmı túrde Abaı kúni bolyp bekitilýi, aqyn shyǵarmalarynyń álemniń negizgi tilderine aýdarylýy jáne Almatyda Abaı ulttyq mektebiniń salynýy – uly oıshyldy ulyqtaýdaǵy mańyzdy qadamdar. Sondaı-aq, «Tolyq adam» tujyrymdamasynyń qazirgi memlekettik saıasatpen úndes ekenin jetkizdi.
– Mundaı is-sharalardy Abaıǵa taǵzym etý ǵana emes, onyń oılaryn zamanaýı turǵyda jańasha túsinip, ómirde júzege asyrýǵa jańa múmkindik dep qabyldaımyz, – dedi Máýlen Áshimbaev.
Mereıtoı aıasynda halyqaralyq, respýblıkalyq jáne óńirlik deńgeıde 100-den astam is-shara ótip jatyr. Olardyń qatarynda aıtys, ulttyq óner festıvali jáne basqa da iri jobalar bar. Sondaı-aq, «ABAY ACADEMIYASY» alǵashqy ensıklopedııalyq portaly iske qosylyp, Semeıde ınklıýzıvti kitaphana ashyldy.
О́ńirge sapary barysynda Senat Tóraǵasy Abaı men Shákárimniń kesenelerin zııarat etip, Qaraýyl aýylyndaǵy aqyn eskertkishine gúl shoǵyn qoıdy.
Abaıdyń 180 jyldyq mereıtoıy ulttyq deńgeıdegi mádenı oqıǵaǵa aınaldy. Oǵan 15 elden kelgen delegasııalar, zııaly qaýym ókilderi, jastar men qoǵam qaıratkerleri, barlyǵy 30 myńnan astam adam qatysty.