Týrızm jáne sport mınıstri Erbol Myrzabosynov taekvondodan XXXII jazǵy Ýnıversıada men jasóspirimder arasyndaǵy Azııa chempıonatynyń júldegerlerimen kezdesti. Is-sharaǵa Halyqaralyq taekvondo federasııasynyń (WT) prezıdenti Chýngvon Choý, Qazaqstan taekvondo federasııasynyń prezıdenti Qudiret Shamıev, jattyqtyrýshylar jáne jas sportshylar qatysty, dep habarlaıdy Egemen.kz.
Eske salaıyq, Germanııada ótken XXXII jazǵy Ýnıversıadada Samırhon Ababakırov altyn medal jeńip alsa, Malaızııada ótken jasóspirimder arasyndaǵy Azııa chempıonatynda Aıym Serikbaeva, Býned Bahramqulov, Arýjan Naımanbaeva top jardy. Sary qurlyq dodasynda erekshe kózge túsken Aıym Serikbaeva týrnırdiń úzdik sportshysy atansa, jeke bapkeri Erkebulan Ermekálıev sportshyny daıyndaǵany úshin alǵys hatpen marapattalǵan edi.
Jıyn barysynda doktor Choýǵa taekvondony jahandyq deńgeıde damytýǵa qosqan úlesi úshin alǵysyn bildirgen E.Myrzabosynov sondaı-aq ulttyq quramanyń bas bapkeri Esbol Sultanovqa otandyq taekvondony damytýǵa qosqan eleýli úlesi jáne komandamen tabysty jumysy úshin alǵys aıtty. Sonymen qosa, mınıstr júldegerlerdi quttyqtady.
«Búginde memleket sizderdiń joǵary jetistikke jetip, sheberlikterińizdi shyńdaýǵa barlyq jaǵdaı jasap otyr, árqaısyńyzben jeke jumys isteıtin jattyqtyrýshyńyz bar. Búgingi jetistikter – kóp jyldyq eńbektiń, júıeli daıyndyqtyń jáne óz isine adaldyqtyń nátıjesi. Sizder álemdik arenada el namysyn abyroımen qorǵap, elimizdi búkil álemge tanytyp júrsizder», dedi mınıstr.
Sportshylarǵa Qurmet gramotalary, Alǵys hattar jáne federasııa atynan sertıfıkattar tabystaldy.
Aıta ketelik, 14-16 tamyz kúnderi elordadaǵy Jaqsylyq Úshkempirov atyndaǵy jekpe-jek saraıynda taekvondodan Kazakhstan Open 2025 halyqaralyq reıtıngtik týrnıri ótedi. Dodaǵa álemniń 22 elinen 750-den astam sportshy qatysady dep kútilip otyr. Olardyń qatarynda Olımpıada chempıondary, álem chempıonattarynyń júldegerleri jáne álemdik reıtıngtiń kóshbasshylary bar. Jarys kadetter, jasóspirimder jáne eresekter arasynda ótedi.