Astanada elimizdiń túrli salalarynda qyzmet etetin belsendi áıelderdiń bastamasymen qurylǵan «Halyqaralyq «EXPO&WOMEN» uıymy» zańdy tulǵalar birlestiginiń alǵashqy otyrysy bolyp ótti.
Atalmysh uıymǵa bıznes, saıasat, ındýstrııalyq sektor, qoǵamdyq qaıratkerler jáne jýrnalıster kiretin bolady. Uıym prezıdenti Saltanat Raqymbekovanyń aıtýy boıynsha, «EXPO&WOMEN»-nyń negizgi mindeti memlekettik organdar, memlekettiń damý ınstıtýttary, bıznes pen áıelder uıymdary arasyndaǵy yntymaqtastyq pen dıalogty qamtamasyz etý bolyp tabylady. Ol, sonymen qatar, aldyna áıelderdi «Qazaqstan-2050» Strategııasy men «Nurly Jol» baǵdarlamasyn, EKSPO-2017 jobasyn júzege asyrýǵa belsene qatysýǵa jumyldyrýdy, sonymen qatar olardyń jumyspen qamtylý deńgeıin joǵarylatýdy maqsat etip qoıyp otyr. Búgingi tańda uıym birneshe halyqaralyq uıym áleýmettik jobalardy júzege asyrýǵa atsalysyp keledi. Olardyń arasynda taýar óndirýshilerge arnalǵan «Halyq Markasy-2015» ulttyq konkýrsy, EXPO scheber, International Trade Programm, áıelder kásipkerligin qoldaıtyn Design & Art jobasy jáne taǵy basqalar bar. S.Raqymbekovanyń pikirinshe, aldaǵy ýaqytta ótetin halyqaralyq EKSPO-2017 «Bolashaqtyń energııasy» kórmesiniń sátti ótýi Prezıdentimiz Nursultan Nazarbaevtyń HHI ǵasyrdaǵy turaqty damý formýlasy retinde usynylǵan energoekologııalyq bastamalaryn álem halqy birigip belsendi túrde júzege asyrýyna baılanysty. Sonymen birge, halyqaralyq uıymdar men otandyq damý ınstıtýttarynyń ǵalamdyq G-Global jobasy aıasynda qoǵam qaıratkerleri men novatorlardy biriktirýde áleýetti múmkindikter týdyrady. Qazaqstannyń «názik jandary» osyndaı mańyzdy máselelerdi sheshýde beıtarap ustanymda bola almaıdy. Belsendi áıelderdiń bastamalaryna Parlament Senatynyń depýtaty, G-Global Halyqaralyq hatshylyǵynyń jetekshisi Serik Nógerbekov qoldaý kórsetip, ǵalamdyq maqsattary bar jańa uıymǵa kózdegen maqsattaryna qol jetkizý jolyndaǵy serpindi joǵaltpaýlaryn tiledi. – Biz álemdik jáne otandyq ıntellekt qaýymdastyqtarymen, sonyń ishinde tıimdi ınnovasııalyq jobalaryna resýrstaryn salatyn ınvestorlarmen tikeleı dıalog júrgizýge múmkinshilikter týǵyzatyn G-Global kommýnıkatıvtik tuǵyrnamasynyń áleýetti múmkinshilikterin barynsha qoldanýǵa tyrysýdamyz. Búgingi kúni G-Global tuǵyrnamasynda «EKSPO-2017 vırtýaldy kórmesimen» tanysýǵa bolady, al bizdiń bastamalarymyz ben jobalarymyz ǵalamdyq oqıǵalarǵa qyzyǵýshylyqty arttyryp, qazaqstandyqtarda jańa oılaý úderisi «tehnologııalyq» oıdy qalyptastyrýda qolǵabys bolady, – dedi S.Nógerbekov osy oraıda. Sonymen qatar, otyrysta uıymǵa múshe bolý, Astana men Mılanda ótetin is sharalar, jáne Qazaqstan men basqa memleketterdegi ókildikter týraly suraqtar talqylandy.
Sáken MAILYBAI.