ASTANA. 6 tamyz. AQSh-ta 35 jyl buryn belgili polıak-amerıkan mýzykanty, oqytýshy Roman Totenbergten urlanǵan Stradıvarıdiń skrıpkasy tabyldy. Mýzykalyq aspap skrıpkashynyń qyzdaryna qaıtarylady. Bul týraly TASS habarlady.
Associated Press agenttiginiń aqpary boıynsha, 1734 jyly ataqty ıtalıan sheberi Antonıo Stradıvarı jasaǵan ishekti aspap 1980 jyly urlanǵan. R.Totenbergtiń skrıpkasy ózi basqarǵan Kembrıdj qalasyndaǵy mýzyka mektebinde bergen konsertinen keıin joǵalyp ketken. Kúdik aspaptyń qasynda aınalshyqtap júrgen jas mýzykant Fılıp Djonsonǵa túsken, biraq oǵan aıyp taǵý úshin naqty dálel bolmaǵan.
F.Djonson 2011 jyly qaıtys boldy. Ol skrıpkany arnaıy qabyna salyp kilttep, burynǵy áıeline berip ketken eken. Birneshe jyl boıy kilttiń qupııa kodyn bile almaı kelgen áıel aspaptyń qabyn bıyl ǵana ashyp, ony baǵalaýshyǵa alyp barǵan. Al baǵalaýshy skrıpkany tanyp, sol boıda urlanǵan óner shyǵarmalaryn izdeýmen aınalysatyn FBR bólimine habar bergen.
Boston ýnıversıtetiniń professory R.Totenberg 2012 jyly 101 jasynda qaıtys boldy. Onyń úsh qyzynyń biri Nına Totenberg ákesiniń urlanǵan skrıpkany eske alǵanda qatty muńaıatynyn, ol úshin bul oqıǵa otbasynyń bir múshesinen aıyrylýmen birdeı bolǵandyǵyn aıtady.
Aıdar О́risbaev.
Derek: tass.com.
Sýret: eruditam.net.