Maıdangerlermen maǵynaly áńgime

Uly Jeńis kúni qarsańynda Qazaqstannyń Reseıdegi Elshisi Marat Tájın soǵys jáne eńbek ardagerlerimen kezdesý ótkizdi. Elshi ardagerlerdi kele jatqan mereıtoımen quttyqtap, barlyq Uly Otan soǵysyna qaty­sý­shy­larǵa zor alǵysyn aıtty. – Osydan 70 jyl buryn bir-birine dos bolǵan sol kezdegi bir memlekettiń halyqtary qaýip tóndirgen jáne basqynshylyq shabýyl uıymdastyrǵan fashızmdi toqtatty, – dedi elshi jáne Ekinshi dúnıejúzilik soǵystyń tarıhyn qaıta qaraýdan saq bolý kerek ekenin eskertti. Elshiniń pikirinshe, Keńes Odaǵynan keıingi keńistiktegi ár otbasy Uly Otan soǵysynan zardap shekti, sondyqtan bul soǵys árkimniń taǵdyrynda aıtarlyqtaı iz qaldyrdy. – Ásirese, jastar úshin ómir tek qazirgi kez jáne bolashaqtan tur­maıdy, ótken kezden de qalyp­ta­satynyn esten shyǵarmaý asa mańyzdy, – dep málimdedi Marat Tájın. – Sol soǵystaǵy Uly Jeń­is­ti máńgilik dep ataýǵa bolady. Máńgiliktiń ótken ýaqyt­tan aıyrmashylyǵy anyq, máselen, ótken ýaqyt ketip qalady, al máńgilik ár kezde júreginde, esinde, rámizderde, merekelerde, salt-dástúrlerde jáne este saqtalady. Kezdesý barysynda Elshi TMD Memleketteri basshylary keńesiniń sheshimi boıynsha qu­ryl­ǵan «1941-1945 jyldar kezeńindegi Uly Otan soǵysyndaǵy Jeńiske – 70 jyl» dep atalǵan mereıtoılyq medaldar­dy ardagerlerge óz qolymen tabys etti. Osy oqıǵaǵa baılanysty Qa­zaq­stan Elshiligine jolyqqan Reseı­diń halyq ártisi Renat Ibra­gımov pen Reseı astanasynda oqyp jatqan qazaqstandyq stýdentter soǵys keziniń ánderin shyrqady. Sóıtip, ar­da­gerlerge qurmet kórsetip, kóńil­derin kóterdi, dep habarlady Qazaqstannyń Reseıdegi Elshi­liginiń baspasóz qyzmeti.