ASTANA. 9 mamyr. Aqtóbe mańyndaǵy Bestamaq aýylynda keleńsiz oqıǵa boldy. Naqty aıtsaq, jetkinshekter aýyldaǵy qorymdy qıratyp ketken. Bul týraly aktobetimes.kz habarlady.
Jelikken jastar beıit basyndaǵy granıt eskertkishterdi qıratyp, alqagúlderin taptap, qorshaýlary men kresterin syndyryp tastaǵan. Qorymdy qorlaǵan buzaqylar birden ustaldy. Olar jastary nebári 13-14-tegi Bestamaq aýylynyń balalary bolyp shyqty. Kámelettik jasqa tolmaǵan jetkinshekterdiń bul áreketke ne úshin barǵandary belgisiz. Alaıda, osy essiz qylyqtarymen olardyń talaıdyń janyn jaralaǵandary anyq.
Qalalyq ishki ister departamentiniń habarlaýynsha, ustalǵan jetkinshekterdiń barlyǵy óz kinálaryn tolyq moıyndaryna alǵan.
Beıit basyndaǵy bul bassyzdyq týraly aktóbelik turǵynnyń biri áleýmettik jelidegi jeke paraqshasynda jarııalaǵan. Paraqshada: «Búgin tańda ápkem habarlasyp, Bestamaqtaǵy qorymda ájemniń basyna qoıǵan eskertkishti syndyryp ketkeni týraly jylap turyp aıtty. Beıit basyna kelgende – jaǵamyzdy ustadyq. Buzaqylar eskertkishke aq boıaý jaǵyp, birneshe bólikke syndyryp ketken. Beıittiń janynda turǵan gúl salatyn qumyra da qırap jatyr. Gúlderdiń bári qoparylǵan. Ydystar synyp, buzaqylar ózge bir ıkondardy qaldyryp ketken. Beıitten úlken kólemdi aıaq kıimniń izderi anyq kórinedi. Biz osylaı qırap jatqan 12 beıitti sanap shyqtyq. Onyń barlyǵy qara mármárdan turǵyzylǵan eskertkishter. Buzylǵan taǵy 4 beıittiń basynda krest bolǵan. Bul sotqarlardy tabady degen senimdemin. Eskertkish pen qorshaýǵa ketken aqsha da mańyzdy emes. Tek osyndaı bassyzdyqqa barǵandardyń kózine qaraǵym keledi!», – dep jazylǵan.
Qorymnyń qırap jatqany týraly 2 mamyr kúni belgili boldy. Jábirlenýshiler oqıǵa ornyna birden polısııa qyzmetkerlerin shaqyrtady. Tártip saqshylary granıt tastardan saýsaq tańbalaryn túsirip, Bestamaq aýylynyń turǵyndarynan jaýap aldy. Qazirgi tańda bul keleńsiz jaıtqa qatysty «Vandalızm» babymen qylmystyq is qozǵaldy.
Elaman Qońyr.
Derek: aktobetimes.kz.
Sýret: rubsev.ru.