Aqtóbede bes jyldan beri kóppáterli turǵyn úı qurylysyna qarjy salǵan 58 úleskerdiń sheshilmeı kele jatqan daýyna núkte qoıyldy. Táýelsizdik merekesinde oblys ortalyǵyndaǵy «Altyn orda» shaǵyn aýdanynda uzaqqa sozylǵan nysan «Exclusive» turǵyn úı kesheninde turǵyndarǵa páter kiltteri tabystaldy, dep habarlaıdy Egemen.kz.
80 páterli kópqabatty úıdiń qurylysyn «Aktobe ROM Group» JShS-i basshylyǵy 2021 jyldyń naýryzynda bastaýǵa ýáde etip, aıaqsyz qalǵan edi.
Sot sheshimimen «Exclusive» turǵyn úı keshenine qarjy salǵan úleskerlerdiń 553 mln teńgege shyǵynǵa batqandary rastaldy. Jumysty jalǵastyrýdy 2022 jyly qurylǵan «Aqnıet –2022» turǵyn úı-qurylys kooperatıvi mindetine alyp, eki jyl ishinde aıaqtady.
Aıta ketý kerek, kúni búginge deıin 2021 jyldan beri turǵyn úı qurylysyna úleskerlik ádispen 6,3 mlrd teńge qarajat salǵan 845 aqtóbeliktiń máselesi ózekti bolyp tur. Úleskerlik daýdy sheshý maqsatynda 2023 jyly «Aqtóbe qurylys kompanııasy» JShS-i qurylyp, zardap shegýshiler men qurylys kompanııalarynyń arasyndaǵy máseleni zertteýge aldy. Qurylys materıaldarynyń qymbattaýyna baılanysty qarajat jetpeı qalǵan seriktesterge qoldaý kórsetilse, josyqsyz merdigerlerge qylmystyq ister qozǵaldy.
Osy jyly jurttyń aqshasyn alyp, úıin salmaǵan eki turǵyn úı kooperatıviniń basshysy sottaldy. Aldaǵy ýaqytta páterleri daıyn bolǵan úleskerlerge kezeń-kezeńimen páter kiltteri tabystalatyn bolady.
Aqtóbe oblysy