QOSTANAI. 12 mamyr. Qostanaılyqtar Jeńis kúnin atap ótti. Túnimen, kúnimen quıǵan aq jaýyn atalar rýhyna taǵzym etýdi maqsat tutqan merekelik sharaǵa kedergi bolǵan joq. Myńdaǵan qostanaılyqtar maıdanda Otan úshin keýdesin oqqa toqsan atalarynyń, ákeleriniń portretin kóterip, ortalyq alańǵa keldi. Bul týraly egemen.kz tilshisi habarlady.
Oblystyq ákimdiktiń aldynda Uly Otan soǵysyndaǵy atalar erligin pash etetin teatrlandyrylǵan kórinis kórsetildi. Kýrsanttar jáne soǵysqa qatysqan atalarynyń portretin kótergen qalalyqtar Jeńis saıabaǵyna qaraı bet túzedi. Onda belgisiz soldat pen máńgilik otqa gúl shoqtaryn qoıdy. Oblys ákimi Nuraly Sádýaqasov soǵys ardagerlerin jáne qostanaılyqtardy Uly Jeńis kúnimen quttyqtady. Maıdangerlerge qurmet kórsetildi.
Surapyl soǵystyń ár otbasynda búginge deıin izi bar. Ákesiniń portretin kóterip kelgenderdiń biri Gúlzıhan Asqarqyzy tolqyp tur eken. Biz tildeskende kóz jasyna erik berdi.
Qostanaı qalasynyń turǵyny Gúlzıhan Asqarqyzy: «Ákem Asqar Bektibaev 17-18 jas shamasynda maıdanǵa ketken. Ýkraın maıdanynda soǵysyp, Vengrııaǵa deıin barǵan. Sol jerde aýyr jaralanǵan. Soǵystan kelgen soń qalada partııa jáne kásipodaq qyzmetterinde istedi. Biraq soǵysta alǵan jarasy onyń densaýlyǵyn nasharlata berdi. Denesinde qalǵan snarıad jaryqshaqtarynan 52 jasynda qaıtys boldy. Búgin Jeńis kúni jańbyrdyń quıyp turǵanyna qaramastan ákemniń árýaǵy rıza bolsyn dep, máńgilik ottyń basyna kelip turmyn. Myna qabyrǵada soǵystan qaıtpaǵan qanshama ákelerimizdiń, atalarymyzdyń aty jazylǵan. Keýdesin oqqa toqsqan sol bozdaqtardyń arqasynda búgingi beıbit kúnniń qyzyǵyn kórip otyrmyz», dedi.
Soǵysqa Qostanaı oblysynan 73500 adam attanǵan eken. Sonyń jartysynan kóbi maıdan dalasynda qalǵan, týǵan jerdiń topyraǵyn basqan joq.
Jeńis saıabaǵyna jınalǵandar belgisiz soldat eskertkishi janyndaǵy Máńgilik ottyń janyna kelip, búgingi beıbit kún úshin fashızmmen alysqan atalarymyzdyń rýhyna taǵzym etti. Jyldaǵy dástúr boıynsha soldat botqasynan dám tatty. Erlikpen qaza tapqan atalarymyzdyń búgingi urpaqtary soldat botqasynan dám tatty.
Názıra Járimbetova.
Derek, sýret: egemen.kz