ASTANA. 12 mamyr. Búgin О́zbekstan shekarashylary shekaradan kókónis pen jemis-jıdek alyp ótip bara jatqan Qyrǵyzstan azamattaryna qaraı oq atyp, bir adamdy atyp óltirdi. Bul týraly AKIpress habarlady.
«12 mamyr kúni memlkettik shekaranyń qyrǵyz-ózbek ýchaskesinde ınsıdent oryn alyp, onyń barysynda Qyrǵyzstan azamaty qaza tapty, taǵy bir azamatty О́zbekstan ulttyq qaýipsizdik qyzmeti shekara áskerleriniń áskerı qyzmetkerleri qamaýǵa aldy», - delingen agenttik habarlamasynda.
Qyrǵyzstan memlekettik shekara qyzmetiniń baspasóz qyzmeti habarlaǵandaı, oqıǵa memlekettik shekaranyń Batken oblysy Batken aýdany Sogment eldi mekeniniń shetindegi áli kelisimge kelmegen Qaqyr degen jerinde bolǵan.
Aldyn ala málimet boıynsha, Qyrǵyzstannyń úsh azamaty «Mersedes Bens Gıgant» júk avtokóligimen О́zbekstan jerinen Qyrǵyzstanǵa qaraı ótkizilim beketinen tys aýmaqtan kókónis pen jemis-jıdek alyp ótpek bolǵan.
О́zbek jaǵynyń aqparyna qaraǵanda, Qyrǵyzstan azamattary О́zbekstan shekara jasaǵynyń toqtaý jónindegi talaptaryna baǵynbaǵan. Sodan keıin ózbek shekarashylary Qyrǵyzstan azamattaryna qarsy qarý qoldanýǵa májbúr bolady. Nátıjesinde Qyrǵyzstannyń bir azamaty jaraqat alyp, О́zbekstannyń Soh qıshloǵyndaǵy aýrýhanaǵa túsedi. Keıin sol keselhanada kóz jumady. Taǵy bir azamatty ózbek shekarashylary qamaýǵa alady. Al úshinshi azamat ustatpaı, qashyp ketedi.
Qazir ózbek jaǵy Qyrǵyzstannyń qolǵa túsken azamatyna qatysty tergeý sharalaryn júrgizip jatyr.
Sonymen birge О́zbekstanǵa qaraıtyn Soh anklavy terrıtorııasynda Qyrǵyzstan men О́zbekstan shekarashylarynyń ókilderi atalmysh ınsıdenttiń sebepteri men ahýalyn anyqtaý úshin kezdesý ótkizýde.
Qurysh Nurymbet.
Derek, sýret: AKIpress.