Eýroaımaqtaǵy elderdiń oblıgasııalarynyń keri kiristiliginiń artýy defolt tarıhyndaǵy eń irileriniń birine aınalýy ábden múmkin. Osyǵan oraı, sarapshylar sońǵy ýaqyttary damyǵan elderdiń qarjy problemasyndaǵy osy bir jaǵdaıdy jahandyq kólemdegi baqylaýǵa kónbeıtin daǵdarysqa alyp kelýi ǵajap emes degendeı pikirler bildire bastady.
The Telegraph agenttigi óz maqalalarynda atap kórsetkendeı, qazirgi kúni eýroaımaq elderiniń barlyq memlekettik oblıgasııalarynyń 30 paıyzdan astamy keri paıyzdyq stavkaǵa ıe bolyp otyr. Bul qundy qaǵazdar kólemi 2 trıllıon eýrony quraıdy. Mundaı jaǵdaı eýroaımaqtaǵy makroekonomıkalyq jaǵdaıǵa qosymsha aýyrtpalyqtar túsiredi. Jáne aımaqtyń qarjylaı turaqtylyǵyndaǵy táýekeldi arttyrady.
Sarapshy Ýornerdiń aıtýynsha, Eýropalyq ortalyq bank sandyq jumsartý saıasatyn júzege asyra bastaǵannan beri memlekettik oblıgasııalar ósiminiń keri kiristiligi barynsha óse túsýmen qatar, júıeli sıpatta ıe bola bastady.
«Eger árbir el jaǵdaıyna jekeleı úńiletin bolsaq, statıstıka kórsetkishteri bizdi tipti, tańǵaldyra túsedi. Jefferies ınvestısııalyq bankiniń málimeti boıynsha nemis oblıgasııalarynyń 70 paıyzǵa jýyǵy keri kiristilikpen saýdalanýda. Fransııada bul kórsetkish 50 paıyzǵa jetip otyr», dep málimdegen Ýorner.
Eger eýroaımaqtyń daǵdarys jaǵdaıyn áli de jalǵastyryp kele jatqandyǵyn eske alatyn bolsaq, bul qıyndyqtan qutylýdyń amaldarynyń azaıa túskendigine, al defolt qateriniń kúsheıip kele jatqandyǵyna jáne onyń qazirgi kezdiń ózinde naqty sıpat ala bastaǵandyǵyna kóz jetkizemiz.
Eýropalyq elderdiń memlekettik qaryzdarynyń artýy jaǵdaıdy odan ári ýshyqtyra túsýde. Qazirgi kúni bul qaryzdyń kólemi eýroaımaq boıynsha ishki jalpy ónimniń 91,9 paıyzyna jetti. Eýroaımaqtyń eń iri ekonomıkasy Germanııada bul qaryz kólemi 74,7 paıyzǵa jetse, Fransııadaǵy borysh 95 paıyzdy, Ulybrıtanııada 98,4 paıyzdy quraıdy. Sondaı-aq, álemniń eń iri ekonomıkasy sanalatyn Amerıka Qurama Shtattarynda da jaǵdaı ońyp turǵan joq. Mundaǵy memlekettik qaryz kólemi qazirdiń ózinde 18 trıllıon dollardan asyp túsip otyr.
Sonymen, barǵan saıyn aıqyn sıpat alyp kele jatqan borysh daǵdarysy Batys elderiniń ekonomıkalyq damýyna tótenshe qysym túsirip otyr. Qazirgi kúngi munyń úlken kórinisi memlekettik mindettemeler kiristiliginiń teris sıpatqa ıe bolýy. Sarapshylardyń pikirinshe, oqıǵalardyń osylaısha shıelenise túsýi túptiń-túbinde batys ekonomıkasynyń kúrt qulaýyn týyndatýy da ǵajap emes.