Qostanaıda múmkindigi shekteýli azamattarǵa arnalǵan «Múmkindik» áleýmettik-quqyqtyq aksııasy ótti. «Zań men tártip» qaǵıdaty aıasynda óńirde alǵash ret uıymdastyrylǵan ıgi sharaǵa prokýratýra qyzmetkerleri, jergilikti atqarýshy organdar men ýákiletti qurylym ókilderi, sondaı-aq jumys berýshiler, oqý ortalyqtarynyń basshylary men volonterler qatysty.
Oblys prokýrory Marat Seksembaevtyń aıtýynsha, aksııa oblystyń barlyq qalasy men aýdanynda bir mezgilde bastaý alǵan. Uıymdastyrýshylar shalǵaı eldi mekenderde turatyn azamattardyń da nazardan tys qalmaýyn eskeripti.
– Is-sharaǵa 150-den astam memlekettik organ, 146 jumys berýshi kásiporyn, 12 oqý ortalyǵy, 11 úkimettik emes uıym, sonymen qatar belsendi jastar qatysyp jatyr. Aksııa barysynda 1500-den astam múmkindigi shekteýli azamat ýákiletti organ ókilderimen júzbe-júz tildesip, túıtkildi saýaldaryna jaýap alady. Keıde múgedektigi bar jandardyń jumysqa ornalasýyna, áleýmettik-medısınalyq kómek alýyna nemese baspana máselesin sheshýge kedergi bolatyn jaıttar kezdesip jatady. Sondyqtan erekshe qajettiligi bar jandardyń jaǵdaıyna tereńirek úńilip, jan-jaqty qoldaý kórsetetin osyndaı is-sharalardy jıi uıymdastyryp turǵan abzal, – dedi oblys prokýrory.
Jıynǵa úlken úmit arqalap kelgenderdiń birazynyń máselesi sol mezette oń sheshimin tapty. Máselen, erekshe bala tárbıelep otyrǵan Qostanaı qalasynyń turǵyny Dıana Qurmanova bir jyldan beri túrli bıýrokratııalyq kedergilerge tap bolyp, ulyna zań júzinde tıesili em-sharaǵa qol jetkize almaı kelgen edi. Oblystyq jumyspen qamtamasyz etý jáne áleýmettik baǵdarlamalar basqarmasynyń mamandary ananyń ótinishin taban astynda qarastyryp, qaladaǵy beıimdeý ortalyqtarynyń birine tegin joldama berdi.
– Men sııaqty erekshe qamqorlyqty qajet etetin bala tárbıelep otyrǵan ata-analarǵa mundaı kezdesýlerdiń mańyzy zor. Keıde balam úshin talaı mekemeniń tabaldyryǵyn tozdyrýǵa týra keledi, ony jetelep ár jerge barý ońaı emes. Mine, búgin kópten beri qolymyz jetpeı júrgen joldamany alyp, qýanyp jatyrmyz. Igi is-sharany uıymdastyrǵan azamattarǵa alǵysym sheksiz, – deıdi D.Qurmanova.
Jıyn barysynda zaǵıp jandar da ózderin tolǵandyrǵan saýaldarǵa tushymdy jaýap alyp, bilikti mamandardyń keńesin tyńdady.
Búginde oblys ortalyǵynda 9 myńnan astam múmkindigi shekteýli jan bar bolsa, onyń jartysyna jýyǵy úshinshi topqa jatady. Bul degenimiz – olardyń eńbekke aralasyp, jumys isteýge múmkindigi bar degen sóz. Osy oraıda, atalǵan sanattaǵy birsypyra azamat jumysqa ornalasý jóninde jumys berýshilermen kelisimshartqa otyrdy.
Aksııa aıasynda «Otbasy bank» AQ ókilderi múgedektigi bar adamdar men olardyń otbasyn turǵyn úımen qamtamasyz etý, qoldanystaǵy baǵdarlamalar, jeńildetilgen nesıe alý joldary týraly aqparat berdi. Kásipkerler palatasynyń mamandary bıznes bastaýǵa nıetti jandarǵa memlekettik qoldaý tetikterin túsindirip, bıznes-jospar qurý, granttar men sýbsıdııalar alý jóninde keńes usyndy.
Qostanaı oblysy