Ortalyq kommýnıkasııalar qyzmetinde «Qazaqstan temir joly» UK» AQ vıse-prezıdenti Roman Sklıar men kompanııanyń Kóliktik logıstıkasyn damytý ortalyǵy fılıaly dırektorynyń orynbasary Abdýr-Rashıd Sákenov baspasóz máslıhatyn ótkizdi. Onda «Qazaqstannyń tranzıttik áleýetin arttyrý, ulttyq kóliktik-logıstıkalyq ınfraqurylymdy tıimdi damytý» taqyrybynda áńgime qozǵaldy.
«Nurly Jol» memlekettik baǵdarlamasy aıasynda ulttyq kóliktik-logıstıkalyq ınfraqurylymdy damytý – Qazaqstan aýmaǵyndaǵy tranzıttik júk aǵynyn tartýǵa qolaıly jaǵdaı jasaýǵa mindetteıdi. «Bul tapsyrmany oryndaý maqsatynda ótken jyly birqatar jobalar iske qosylyp, paıdalanýǵa berildi. Atap aıtqanda, 13 stansa men 32 jol aıryǵynan turatyn Jezqazǵan-Beıneý temirjol jelisi salyndy. Jol paıdalanýǵa berilgen ýaqyttan bastap 3 mln. tonna júk dittegen jerine osy jańa jeli arqyly jetkizildi. 900-den astam júk poıyzy ótkizildi. Qazaqstan, Túrikmenstan, Iran arqyly ótetin О́zen-Bereket-Gorgan jańa temirjol jelisi tabysty jumys istep jatyr. Ústimizdegi jyly Bolashaq-Serhetıaka shekaralyq beketi arqyly 1 mln. tonnadan astam júk tasymaldandy», dedi ol.
Onyń sózine qaraǵanda, qurǵaq port, logıstıkalyq jáne ındýstrııalyq aımaq, sonymen qatar «Qorǵas-Shyǵys qaqpasy» AEA ınfraqurylymy nysandarynyń qurylysy belgilengen keste boıynsha júrgizilip jatyr eken. Búgingi tańda atalmysh jobany júzege asyrýǵa 75 qatysýshy tirkelipti. Arnaıy ekonomıkalyq aımaq nysandaryn júzege asyrýǵa álemdegi iri kompanııalardy tartý sharalary jalǵasyn taýyp jatyr. Al, elimizdiń eksporttyq áleýetin damytýda batys óńirdiń kóliktik júıesin jetildirýge zor kóńil bólinýde. Jylyna 3 mıllıon tonna júk óńdeý qýaty bar úsh jańa júk termınalyn ashý arqyly Aqtaý teńiz portynyń áleýetin arttyryp, Kaspıı boıyndaǵy júk tasymalynyń 25 paıyzyn qamtýǵa bolady. Quryq teńiz portynan jylyna 4 mln. tonna júk óńdeıtin parom kesheniniń qurylysy bastalypty. Bıylǵy jyly Borjaqty-Ersaı jańa temirjol jelisin paıdalanýǵa berý arqyly jaǵalaýdaǵy ındýstrııalyq jobalardyń ınfraqurylymdyq negizi jasalady eken. Eldiń tranzıttik áleýetin arttyrý, tasymaldaý úderisiniń tıimdiligin kóterý, Almaty-Shý temirjol teliminiń tasymaldaý ýaqytyn qysqartý maqsatynda ekinshi temirjol jelisiniń qurylysy da bastalyp ketipti. Osyny aıtqan Abdýr-Rashıd Sákenov, taıaý bolashaqta Astana áýejaıynda ushý-qoný alańyn qaıta jaraqtandyrý men jańa termınal qurylysyn júzege asyrý josparlanyp otyrǵanyn jetkizdi. Baspasóz máslıhaty spıkerleriniń sózine ılansaq, bul qolǵa alynǵan kóliktik ınfraqurylymdy damytý sharalary elimizdiń tranzıttik áleýetin damytýǵa qolaıly jaǵdaı týǵyzyp, ekonomıkalyq ósimdi qamtamasyz etedi.
Nurbaı ELMURATOV, «Egemen Qazaqstan».