Keshe «Nazarbaev ortalyǵynda» Qazaqstan Respýblıkasy Tuńǵysh Prezıdenti – Elbasy Qory syılyǵynyń laýreattaryn marapattaý rásimi ótti. Bul sharanyń negizgi maqsaty – mádenıet pen óner salasyndaǵy jas shyǵarmashyl qyzmetkerlerdiń jetistikterine qoldaý kórsetý jáne baǵalaý, sondaı-aq, ǵylym men tehnıka salasyndaǵy jas ǵalymdardyń ǵylymı-zertteý jumystary nátıjelerin taný bolyp tabylady.
Elbasy Qory 2008 jyldan beri taǵaıyndap kele jatqan syılyqty ıelený úshin bıylǵy konkýrsqa respýblıkanyń túkpir-túkpirinen 100-den astam úmitker usynylǵan eken. Olardyń ishinde: mýzyka, teatr jáne beıneleý óneri, kınematografııa, kórkem ádebıet, jýrnalıstıka, fızıka, matematıka, ınjenerlik, qoǵamdyq jáne gýmanıtarlyq salalar bar. Konkýrsqa kelip túsken jumystardy qarap, saralaý jumysyn Jas ǵalymdar keńesiniń jáne Qordyń janyndaǵy Shyǵarmashyl jastar keńesiniń músheleri atqarǵan.
Sonymen, júzden júırik, myńnan tulpar 21 laýreattyń qatarynda kimder bar degenge keletin bolsaq, Abaı atyndaǵy Qazaq memlekettik akademııalyq opera jáne balet teatrynyń balet ártisi Álııa Sapýgova, «Astana Opera» teatrynyń jetekshi solısi Súndet Baıǵojın, Kompozıtorlar keńesiniń múshesi Ǵalymjan Sekeev, Botanıka jáne fıtoındýstrııa ınstıtýtynan bıologııa ǵylymdarynyń kandıdaty Natalıa Kýrbatova, L.N.Gýmılev atyndaǵy Eýrazııa ulttyq ýnıversıtetiniń tehnıkalyq fızıka kafedrasynyń dosenti Áset Qaınarbaı jáne basqa da daryndy adamdar bar.
Raýan QAIDAR,
«Egemen Qazaqstan».
Sýretti túsirgen
Erlan OMAROV.