QYZYLORDA. 13 aqpan. Qyzylorda qalasynyń ákimi Nurlybek Nálibaev halyq aldynda esep berdi. Jyldy qorytyndylaý jıynyna aımaq basshysy Qyrymbek Kósherbaev qatysty. Bul týraly egemen.kz tilshisi habarlady.
Aldymen qalalyq jergilikti polısııasy qyzmetiniń basshysy, podpolkovnık Qýanysh Shúkirov esep berdi. Onyń aıtýynsha, jańa jyldan óz jumysyn bastaǵan jergilikti polısııa tıimdiligin kórsetip otyr.
Al shahar basshysy oblys ortalyǵynda jyl boıy atqarylǵan jumystardy saralap, aldaǵy josparlarymen bólisti. Byltyr jańa óndiris oryndary ashylyp, jumyssyzdyq deńgeıi azaıdy. Memlekettik baǵdarlamalar oryndalýy, áleýmettik-ekonomıkalyq qoldaýdyń artqandyǵyn salystyrmaly kórsetkishten anyq ańǵarylady.
Máselen, qalanyń taıqazany 90,3 paıyzǵa artqan. Negizgi kapıtalǵa salynǵan qarjy kólemi 127 mlrd. 341 mln. teńge bolyp, oblysqa salynǵan barlyq ınvestısııanyń 54 paıyzyn qurady. Ekonomıkalyq qıyndyqtarǵa qaramastan Qyzylordada ınfraqurylymdy jańǵyrtý, taza aýyz sýǵa kóshý, sol jaǵalaýmen baılanystyratyn kópirdiń qurylysy sekildi aýqymdy ınvestısııalyq jobalar júzege asýda.
«Sońǵy úsh jylda oblys ortalyǵyn damytýǵa 180 mlrd. teńge qarjy bólindi. Ondaǵan ınvestısııalyq jobalar jasaqtalyp, júzege asyrylýda. Osy aralyqta sol jaǵalaýdyń bas jospary jasaqtalyp, shyny zaýyty qurylysy júrgizilýde. Úsh jyl buryn jumysymyzdy bastaǵanda qalanyń ınjenerlik-kommýnıkasııalar jelileriniń 75 paıyzy tozyǵy jetken edi. Qazir áriptestik aıasynda Eýropalyq qaıta qurý jáne damý bankimen olardy qaıta jańǵyrttyq. Jaqynda el Úkimeti Qyzylorda qalasynda qýattylyǵy 450 mVt bý-gaz elektr stansııasyn salý jóninde sheshim qabyldandy. Oblysymyz damý dınamıkasy boıynsha úzdik 3-4 oryndardy turaqty túrde ıelenýde. Jumysymyz osy qarqynmen ári qaraı jalǵasady», dedi oblys ákimi Qyrymbek Kósherbaev.
Erjan Baıtiles.
Derek, sýret: egemen.kz