ASTANA. 14 aqpan. Búgin túnde Serbııanyń astanasy – Belgradta ótip jatqan fýtzaldan Eýropa chempıonatynda Qazaqstan quramasy alań ıeleri – serbterdi 5:2 esebimen utyp, qola júldeger atandy. Bul týraly Vesti.kz portalyna silteme jasaǵan egemen.kz habarlady.
Bas jattyqtyrýshy Kakaýdyń shákirtteri osylaısha tuńǵysh ret qurlyq birinshiliginiń medaline qol jetkizdi.
Úshinshi orynnyń taǵdyryn sheshkeli turǵan bul matchqa eki jaq ta saqadaı-saı keldi. Serbter jergilikti jankúıerlerdiń zor qoldaýlaryna súıense, qazaqstandyqtar óziniń tarıhyndaǵy eń alǵashqy iri halyqaralyq jarysynan júldemen oralýǵa bar kúshin saldy. Buǵan osynyń aldynda dıskvalıfıkasııaǵa ushyraǵan qaqpashy Igıtanyń sapqa qaıta oralýy da ıgi áser etti.
Matchtyń birinshi taımy eki jaqtyń da ashyq fýtbol kórsetip, batyl alǵa umtylýlary arqyly kórermen qaýymdy qýanyshqa bóledi. Bul tusta qarsylastar biriniń shabýylyn biri ilip áketip, ilgeri shapqylaýmen boldy. Alaıda, olardyń qaısylarynyń basym ekenin anyqtaý qıyn edi. Al qaqpa aldyndaǵy eń alǵashqy qaýipti sátti serbter týǵyzdy. Olardyń 34 jastaǵy oıynshysy Vladımır Lazıch 9-mınýtta qaqpashymen betpe-bet shyǵyp, dopty Igıtanyń ústinen asyra tastady. Dop sol boıy torǵa qaraı ketip bara jatqanda, ony sońǵy máýritte Leo qaıtaryp úlgerdi. Osynyń artynsha qonaqtar da jaqsy qarsy shabýyl jasaı bildi. Olardyń buryshtamadan jibergen dobyn Mıhaıl Pershın qaqpaǵa shirene urdy. Biraq ol qaqpa baǵanynan qaıtty.
Oıyn osylaısha birinshi taımnyń sońǵy mınýtyna deıin arpalyspen jalǵasty. Eki jaqtyń da gol soǵatyn talaı sátteri boldy, biraq sonyń bárinde de golkıperler bıikten kórinip jatty. Aqyrynda bizdiń Dýglas qarsy jaq qaqpasynan sańylaý taba bildi – 1:0. Ol munda serbter darbazashysy Mıodrag Aksentıevıchtiń qateligin óte jaqsy paıdalanyp ketti.
Ekinshi taım endi qazaqstandyqtardyń shabýylymen bastaldy. Ol jáne bizdiń jigitterdiń tez esepti ulǵaıta bilýlerine jalǵasty. Sóıtip, 21-mınýtta Serik Jamanqulov óte qatty soqqymen Aksentıevıchtiń sol jaq «búıirin» búlk etkizdi. Osymen týrnırdegi altynshy golyn soqqan fýtbolshymyz esepti 2:0-ge jetkizdi.
Osy goldan keıin serbter taıly-taıaǵy qalmaı alǵa umtyldy. Al qazaqtar qorǵanysta qatyp qalmaı, birinshi múmkindik bolǵan sátte jyldam qarsy shabýyl uıymdastyrýǵa kúsh saldy. Olar 29-mınýtta Aleksandr Dovgan shabýyl ótinde bolǵan sátte esepti ulǵaıtýdyń bir múmkindigin jiberip aldy. Arada bir mınýt ótkende, Dýglas sol ókinishtiń ornyn toltyryp berdi - 3:0. Budan keıin burynǵydan beter ashynyp ketken alań ıeleri qorǵanysty múldem umytqandaı boldy. Olar darbazashyny altynshy oıynshyǵa aýystyryp, jappaı alǵa umtylyp jatqan páıtte meımandar taǵy da osydan ońtaıly nátıje shyǵarýdyń joldaryn qarastyryp jatty. Muny jáne kóp kútýge de týra kelgen joq. Bizdiń jigitter osylaısha 32-mınýtta esepti 4:0-ge bir-aq apardy. Ony qarsy jaq qaqpasynyń bos turǵanyn paıdalanǵan Igıta alystan uryp túsirdi.
Qazaqstan quramasy kezdesýdiń 36-mınýtynda tablodaǵy esepti 5:0 etti. Bul joly da Dýglas mergendigimen kózge túsip, oıyndaǵy het-trıgin jasady. Ol qaqpashymen birge-bir shyqqan sátin múlt jibergen joq.
Osydan keıin qazaqstandyqtar birshama bosańsyp oınady. Olar qalǵan 4 mınýtta serbterdiń ashý-yzalaryn birshama qaıtaryp alýlaryna múmkindik berip qoıdy. Sonyń nátıjesinde alań ıeleri eki doptyń qarymtasyn qaıtaryp úlgerdi. Aldymen 38-mınýtta Stefan Rakıch gol saldy, sosyn fınaldyq ysqyryq estilýge eki sekýnd qalǵanda, Slobodan Raıchevıch mergendigimen tanyldy.
Osylaısha Qazaqstan quramasy tuńǵysh ret Eýropa birinshiliginiń qola júldesine qol jetkizdi.
Al chempıonattyń altyn júldesi osynyń aldynda, jartylaı fınalda Qazaqstan komandasyn súrindirgen Ispanııa quramasynyń qanjyǵasyna baılandy. Ispandar fınalda reseılikterdi 7:3 esebimen oısyrata utty.
Damır Qojamqul.
Derek, foto: vesti.kz.