QARAǴANDY. 15 aqpan. Qaraǵandyda aqsha bopsalaý maqsatynda adam urlady degen aıyp taǵylǵan kúdiktiler qolǵa tústi. Bul týraly oblystyq ishki ister departamentiniń baspasóz qyzmetine silteme jasaǵan egemen.kz tilshisi habarlady.
Kúdiktiler 18 jastaǵy qala turǵynyn kepilge alyp, onyń aǵasynan 350 myń teńge kóleminde aqsha alǵan. Bul oqıǵadan habardar bolǵan polısııa qyzmetkerleri jedel jospar quryp, sonyń nátıjesinde «Mısýbısı» avtokóligindegi eki kúdiktini ustady. Tintý barysynda kóliktiń ishinen 12 kolıbrli ańshy myltyǵy men jeti oq, beısbol taıaǵy, pyshaq jáne aqsha tabyldy.
Eki kúdiktiniń sybaılastaryn tabý maqsatynda tártip saqshylary olar turyp jatqan páterge tintý júrgizdi. Nátıjesinde ol jerden taǵy da eki kúdikti men kepilge alynǵan jas jigit tabyldy.
Olar ýaqytsha qamaýǵa alyndy. Qazir sotqa deıingi tergeý amaldary júrip jatyr.
Qaırat Ábildınov.
Derek: Qaraǵandy oblysynyń ishki ister departamentiniń baspasóz qyzmeti.
Sýret: lenta.ru.