ALMATY. 15 aqpan. Keńes áskerleriniń Aýǵanstan jerindegi maıdannan shyǵarylǵanyna 27 jyl tolýyna oraı, 28 panfılovshylar atyndaǵy saıabaqta Máńgilik alaý men ınternasıonalıst-jaýyngerlerge arnalǵan eskertkishke gúl shoqtary qoıyldy. Bul týraly egemen.kz tilshisi habarlady.
Saltanatty sharaǵa Uly Otan soǵysy men Aýǵan soǵysynyń ardagerleri, Almaty qalalyq ardagerler keńesiniń ókilderi, Almaty garnızony áskerı bólimsheleriniń basshylyǵy men jaýyngerleri jáne qala turǵyndary qatysty.
Eske alý jıynynda aldymen sóz alǵan Aýǵan soǵysynyń dańqty batyry, «qara maıor» Borıs Kerimbaev jınalǵan qaýymdy tarıhı kúnmen quttyqtady, ınternasıonalıst jaýyngerlerdiń erlikteri men qurbandarynyń esimi eshqashan da umytylmaıtyndyǵyn eske saldy.
Budan keıin sóz sóılegen Aýǵan soǵysynyń ardagerleri men jurtshylyq ókilderi 1989 jyly 15-shi aqpan kúni Keńes áskerleri Aýǵanstan aýmaǵynan birjola shyǵarylǵanyn, beıbit adamdardyń ómirin joıǵan qasiretti soǵystyń 1979 jyldyń jeltoqsan aıynan 1989 jyldyń 15-shi aqpanyna deıin sozylǵanyn kúńirenip aıtty. Qazaqstan tarıhynyń betterinde bul soǵysqa 22 269 qazaqstandyq jaýyngerdiń qatysqany, onyń 924-i qaza taýyp, 1015 jaýynger elge múgedek bolyp oralǵany, 19 jaýyngerdiń iz-tússiz joǵalyp ketkeni jazyldy.
Jıyn sońynda Almaty garnızonynyń jaýyngerleri men áskerı joǵary oqý oryndarynyń kýrsanttary ardagerlerge qurmet kórsetip, saltanatpen sap túzep, adymdap júrip ótti.
Talǵat Súıinbaı.
Derek, sýret: egemen.kz.