Saılaýdy baıqaý jónindegi respýblıkalyq qoǵamdyq komıssııanyń shtabynda osy komıssııa músheleriniń TMD baıqaýshylar mıssııasy shtaby ókilderi Evgenıı Slobodamen jáne Evgenıı Kozıakovpen kezdesýi ótti.
Kezdesý barysynda Saılaýdy baıqaý jónindegi respýblıkalyq qoǵamdyq komıssııanyń tóraǵasy Nurlan Erimbetov sheteldik áriptesterge atalǵan komıssııanyń qyzmeti, baıqaýshylardy oqytý boıynsha qolǵa alynǵan jumystar, saıası naýqandy saraptaýdyń aǵymdaǵy nátıjeleri jaıly baıandady.
Nurlan Erimbetov komıssııa qyzmeti barysynda Ortalyq saılaý komıssııasy, baıqaýshylardyń halyqaralyq mıssııalarmen, partııalardyń saılaýaldy shtabtarymen, BAQ-pen belsendi túrde is-áreket etetinine toqtaldy. «Búgingi kezdesýge TMD elderiniń baıqaýshylary, ıaǵnı tájirıbeli azamattar kelip otyr. Olar saılaýaldy máselelerge qatysty saraptama júrgizedi. Sebebi, olar – syrtkóz. Bizge olardyń, olarǵa bizdiń tájirıbemiz kerek. Olar saılaýǵa zańnamasyna qatysty saýaldar qoıyp jatyr. Osy másele tóńireginde zertteý júrgizip, halqymyzdyń jaǵdaıymen tanysyp ketedi», – dedi N. Erimbetov. Onyń aıtýynsha, búginde baıqaýshylardy daıyndaý úderisteri bastalyp ketken. «Elimizde 10 myńnan astam baıqaýshy bolady. Olar barlyq eldi mekenderdegi saılaý ýchaskelerinde jumys isteıdi. Barlyq jumys zańǵa sáıkes bolýy kerek», – dedi komıssııa tóraǵasy.
О́z kezeginde TMD baıqaýshylar mıssııasy shtabynyń jetekshisi Evgenıı Sloboda Saılaýdy baıqaý jónindegi respýblıkalyq komıssııamen ózara áreket etýge, aqparatpen jáne tájirıbemen almasýǵa ázirligin bildirip, saılaý naýqanynyń qarqyndylyǵyn erekshe atap ótti. Ol sondaı-aq, Qazaqstandaǵy ashyq saılaý úderisine baıqaýshylardyń, onyń ishinde halyqaralyq baıqaýshylardyń qyzmeti septigin tıgizetinine senimdi ekenin jetkizdi.
Láıla EDILQYZY,
«Egemen Qazaqstan».