Sulýlyqty jasaıtyn kásip

Nurgúl Maqanova tiginshilikti osylaı maqtan tutady Turmysqa shyqqaly júrgen boıjetken Nurgúl Maqanovadaı sheber tiginshini qurbylarynan estipti. Boıjetkenniń qalaǵan jigiti din jolyndaǵy azamat eken, qalyńdyǵynyń dúkendegi ıyǵy, arqasy ashyq turatyn aq kóılek kıgenin unata qoımapty. Sondyqtan qalyńdyq ta – sándiligi turmysqa shyqqan qurbylary kıgen sol aq kóılekterden kem túspeıtin ári dızaıny sol kóı­lekterden alys ta ketpeıtin, bi­raq, bolashaq kúıeýi eskertkendeı, ashyq-shashyq bolmaıtyn kóılek izdepti. Kóńilindegi ondaı kóılekti dúkenderden taba almaǵan. Sondyqtan, sońǵy úmitin úzbeı Nurgúlge keledi. Ekeýi toı kóıleginiń nobaıyn uzaq otyryp jasady. Jıyrma jyldan asa tiginshilik tájirıbesinde oǵan mundaı suranys túspegen eken. Áıtpese, talaı qyzǵa toı kóılegin tigip júr. Nurgúl qalyńdyqtyń kóılegin ulttyq naqyshty, eýro­palyq stıldegi elementterdi aralastyra otyryp, kóılek nobaıynyń birneshe úlgileriniń sýretin saldy. Nátıjesinde   mo­ıyny da, tósi de, arqasy da ja­byq, biraq qalyńdyqqa quıylyp jarasqan, ony aqqýdaı názik, tal-shybyqtaı symbatty etip kór­setken kóılek daıyn boldy. Boı­jetken men bolashaq kúıeý bala Nur­gúlge aqysyn tólep turyp, alǵysyn aıtty. – Dindi – ımandylyqtyń, adam­gershiliktiń qaınar bulaǵy dep bilemiz. Biraq qyzdardyń, tipti, tumshalanyp kıinip alatyny durys emes. Jastyqqa tán sulýlyqty nege jasyrýymyz kerek? Qazaq qyzdarynyń sulýlyǵyn ulttyq kıimimiz odan saıyn aıshyqtap turǵan ǵoı. Men qalyńdyqqa kıim tikkende qazaqtyń ulttyq kıiminiń jeke úlgilerin alamyn, ony búgingi kıim stılimen úılestiremin. Bul meniń tapsyrys berýshilerime unaıdy, – deıdi Nurgúl. Ol dızaıner emes, óziniń nápaqasyn aıyryp júrgen qarapaıym kásibı tiginshi ǵana. Degenmen, Nurgúldiń oıynsha, ár tiginshi ózinshe dızaıner. Su­ranys jasap kelgen ár adamnyń talǵamy, dene bitimi, ákelgen matasy da túrli-túrli. Sondyqtan, tigin­shiniń ár kúngi eńbegi kishigirim shyǵarmashylyq tárizdi. Anasy Sáýle qaladaǵy qury­­lys-jobalaý ınstıtýtynda is­teıtin joǵary bilimdi maman bolatyn. Naryq qyspaǵy qys­qan jyldary jobalaý ınstıtýt­tarynda mamandar shetinen qys­qartyldy, kóptegen bólimderi jabylyp, Sáýle jumyssyz qaldy. Biraq ne nársege de kónterli, tózim­men qaraıtyn anasy sasqan joq, úıde tiginin tigip otyra berdi. Ol kezde Nurgúl mektepte oqıtyn. Eńbek sabaǵynda as pisirý, úıdi kútý, tigin tigý sekildi qyzdardyń bolashaǵyna qajet is úıretile­tin. Ustazy úıretken isti Nurgúl úı­ge kelip, anasynyń qasynda otyryp jalǵastyryp jasaıtyn. – Mektep qabyrǵasynda júr­gende-aq men ózime kóılek tige bastadym. Odan anam eshqandaı qate tappaıtyn. Mektep bitirgen soń Qostanaı qalasyndaǵy №10 tehnıkalyq ýchılıshege baryp, eki jyl oqydym. Sonda ustazdar meniń sheber tigetinime rıza bolyp, maǵan sabaqqa erkin qatysýyma ruqsat berdi. Emtıhandy da kóńildegideı tapsyrdym, – deıdi Nurgúl. Ol mektepti bitirisimen-aq anasymen birge kásibı tiginshi retinde tanyldy. Dúkennen kóńilindegisin kóre almaǵan qyz-kelinshekterdiń, ájelerdiń barlyǵy da Nurgúlge keletin. Bul úrdis áli kúnge deıin úzilgen joq. Qazir Nurgúl Maqanova Qos­­­­tanaı qalasyndaǵy perde, jap­qyshtar tigetin atelede tiginshi bolyp isteıdi. Munda da turǵyndardan túrli suranystar túsip jatady. Adamdardyń tal­ǵamynan shyǵý úshin jáne olardyń suranysyna oraı perde­lerdiń neshe túrin tigedi. Olardyń ból­mege jarasymyn izdeý de bir tylsym dúnıe. Nurgúldiń oıynsha, perde de qyzdardyń sándi kóılegi sekildi, olar úıdegi jıhazdarmen, dúnıe-múlikpen úılesim tabýy tıis. Bul turǵyda kelgen kisilerdiń qatelespeýi, talǵamynan shyǵýy úshin ózderimen otyryp, asyqpaı keńesedi. – Tiginshilik kásip degenińiz jartylaı óner ǵoı. Adamnyń boıynda atalǵan kásipke degen yntyzar­lyq bolmasa, bul mamandyq eki­niń birin asaý attaı aýdaryp ta­taıdy. Osy mamandyǵym arqy­ly adam­darǵa kómegim tıip júredi, ózimniń nanymdy da taýyp kele­min. Bul áıel zatyna Allanyń bergen bir kásibi dep bilemin, – de­di qoshtasarda Nurgúl. Iá, onyń qolynan shyqqan kóılegin tozdyrǵan qostanaılyqtardyń barlyǵy da oǵan syı-qurmetpen qaraıdy. Názıra JÁRIMBETOVA, «Egemen Qazaqstan». QOSTANAI.