ALMATY. 11 naýryz. Almaty qalalyq memlekettik kirister departamenti ekonomıkalyq qylmystardy tergeý qyzmeti qyzmetkerleriniń júrgizgen reıd sharalary barysynda zańsyz kásipkerlikpen aınalysqan qupııa sehtyń jumysy áshkere boldy. Bul týraly Almaty qalalyq memlekettik kirister departamentiniń baspasóz qyzmetine silteme jasaǵan egemen.kz tilshisi habarlady.
Qazirgi ýaqytta salyq zańnamasyna tıisti ózgerister engizilip, salyq tóleýshilerdiń jumysyn jeńildetý maqsatynda kóptegen jeńildikter jasalyp jatqany belgili. Soǵan qaramastan, salyq tóleýden jaltaryp, kóleńkeli ekonomıkanyń yqpalynan shyǵa almaı júrgen sýbektiler sany áli de azaıar emes.
Atalǵan seh birneshe jyl boıy jasyryn túrde eseptik baqylaý markasyn shyǵarýmen aınalysqan. Buǵan qosa shetelderden kontrabandalyq jolmen qymbat markaly vıskıdiń «Makallan», «Chıvas», «Djeımeson», «Djek Denıels», «Absolıýt», «Shvedka», «Moet», «Vdova Klıko», «Don perenıon»,«Elsın» túrlerin jáne «Malboro», «Parlament», «Mevııýs» sııaqty temeki ónimderin aksızdik markasyz ákelip otyrǵan. Osydan keıin jalǵan jolmen ákelgen taýarlarǵa ózderi shyǵarǵan aksızdik markalardy japsyrý arqyly satýmen aınalysqan. Taýarlar Almaty qalasy men Almaty oblysynyń jáne elimizdiń basqa da oblys ortalyqtarynyń kóńil kóteretin túngi klýbtarynda, kazınolarda, karaoke-barlarda jáne meıramhanalarda taratylǵan.
Qupııa sehty áshkereleý barysynda alynǵan operatıvti aqparattar boıynsha kúdikti dep tanylǵan 4 fıgýranttyń úıin tintý barysynda 70 myń dollardan asatyn spırtti ishimdikter men 2000 danadan asatyn eseptik baqylaý markasy jáne jalǵan eseptik baqylaý markasyn shyǵaratyn apparat tabyldy.
Atalǵan oqıǵa boıynsha spırtti ishimdikterdiń sapasy men eseptik baqylaý markasynyń jalǵandyǵyn anyqtaý maqsatynda sot-taýarlyq jáne tehnıkalyq saraptama taǵaıyndaldy. Sonymen qatar Qylmystyq kodekstiń 233, 214 babtary boıynsha №157500121001940 qylmystyq is qozǵaldy. Tergeý barysynda taǵylǵan aıǵaqtar bultartpastaı bolǵandyqtan, ustalǵandar óz kinálaryn tolyqtaı moıyndady jáne tergeý amaldarynyń durys jáne ýaqytynda júrgizilýi úshin atsalysýǵa kelisimderin berdi.
Aınash Esalı.
Derek: Almaty qalalyq memlekettik kirister departamentiniń baspasóz qyzmeti.
Sýret: tengrinews.kz.