Izgi tilekter, aıtylǵan amanattar

Taldyqorǵandaǵy M. Tynyshpaev atyn­daǵy oblystyq tarıhı-ólketaný mura­jaıynda jyr alyby Jambyl Jabaevtyń álemdik ádebıet pen mádenıetke qosqan úlesin jáne qoǵamdyq qyzmetin talqylaý, ómiri men shyǵarmashylyq aspektilerin zertteý maqsatynda salıqaly basqosý boldy. Oǵan Qazaqstan halqy As­sam­bleıasy atynan Parlament Máji­lisiniń depýtattyǵyna kandıdat bolyp tirkelgen «Egemen Qazaqstan» respýblıkalyq gazeti» aksıonerlik qoǵamynyń prezıdenti Saýytbek Abdrahmanov, Parlament Májilisiniń V shaqyrylymynyń depýtaty Roman Kım, Qazaqstan halqy Assambleıasy Keńesiniń múshesi Shakır Hahazov jáne qoǵam qaıratkerleri, oblystyq etno­mádenı birlestikterdiń tóraǵa­lary men «Birlik» jastar qaýym­das­tyǵynyń belsendileri qatysty. «HH ǵasyr Gomeri atanǵan jyr alyby Jambyl Jabaevtyń bizdiń ultymyzdyń maqtanyshy bolatyny sol, álemdik mádenıet qazaqty eń birinshi Jambyl arqyly tanydy. Sebebi, ál-Farabı ashylmaǵan, Abaıdyń ózi iri feodaldyń balasy retinde ǵana aıtylǵan ótken ǵasyrdyń 30-shy jyldarynda Odaqtyń mıllıondaǵan taralymmen shyǵatyn gazetterinde, sodan soń dúnıejúzilik basylymdarda qazaq degen halyqtyń rýhanı qýaty – Jambyldyń jyrlary jarııalandy. Osy qasıeti úshin ǵana Jambyldy qurmetteýge bolady. Atamyzdan qalǵan asyl sózderdiń biri – «eldikti aıt, erlikti aıt, solardyń basyn qosqan tatýlyqty aıt» dep keledi. Mine, sol tatýlyq – bizdiń qazirgi qasıetti týymyz. Osydan 21 jyl buryn Qazaqstan Respýblıkasynyń Prezıdenti Nursultan Nazarbaev Qazaqstan halqy Assambleıasyn qurý týraly Jarlyqqa qol qoıdy. Bul álemdik saıasatta bizdiń Elbasynyń ashqan iri jańalyqtarynyń biri boldy. Kópetnosty qoǵamda mundaı uıym qurý arqyly ár ulttyń basyn qosyp, bir qoldyń salasyndaı, bir úıdiń balasyndaı etip ustaý shyn máninde asa kórnekti saıasatkerdiń ǵana qolynan keldi. Oǵan eń aldymen qazaq halqynyń danalyǵy sebepker boldy. Qazaq halqyna alǵystaryn aǵytqan ulttardyń aýyzbirshiligi sebepker boldy. Osyndaı jaqsy jumystar Jetisý jerinde jalǵasyp jatqandyǵyna kózimiz jetip otyr. Osy tatýlyq uly qazaq jerinde qashanda saqtalady. Bul tatýlyq, birlik, dostyq aldaǵy asýlardan abyroımen asýymyzdyń kepili», – dedi bas basylym basshysy S.Abdrahmanov óziniń sózinde. Kelesi kezekte sóz alǵan Roman Kım 12 jyl buryn toqtap qalǵan Kóksý qant zaýytynyń iske qosylǵanyn Taldyqorǵan óńirinde óndiris oryndarynyń órkendeýine ashylǵan jol dep baǵalady. Al Shakır Hahazov kásiporynnyń 500 adamdy jumyspen qamtyp otyrǵanyn jetkizdi. Eń bastysy, dedi ol, Jetisý jerindegi 103 etnos ókiline pana bolǵan Qazaq eline, jerine alǵystan basqa aıtarymyz joq. Jyr alyby Jambyl Jabaev arqyly qazaq halqyna degen yqylastaryn bildirýdi maqsat tutqan etnostar ókilderiniń oılary bir jerde toǵysyp jatty. Negizi, bul jıyn tarıhı-ólketaný murajaıynda beker uıymdastyrylǵan joq. Maıly boıaýlarmen salynyp, ár ǵasyrdan syr shertetin qundy sýretter qupııasyna qanyǵa túsý, qazaqtyń turmystyq buıymdary men qyshtan jasalǵan qumyralar, at ábzelderin kórsetý arqyly óńir ereksheligi pash etildi. Túrli etnos ókilderi izgi tilekterimen birge amanattaryn da ashyq aıtqan soń, joǵaryda atalǵan taqyryp aıasyndaǵy jıyn qorytyndylandy. Nurbol ÁLDIBAEV, «Egemen Qazaqstan». TALDYQORǴAN.