Qazirgi ýaqytta salyq zańnamasyna tıisti ózgerister engizilip, salyq tóleýshilerdiń jumysyn jeńildetý maqsatynda kóptegen reformalar jasalyp jatqany belgili. Soǵan qaramastan, salyq tóleýden jaltaryp, kóleńkeli ekonomıkanyń yqpalynan shyǵa almaı júrgen sýbektiler sany áli de azaıar emes. Atap aıtsaq, jýyrda Almaty qalalyq memlekettik kirister departamenti ekonomıkalyq qylmystardy tergeý qyzmeti ókilderiniń júrgizgen reıdi barysynda zańsyz kásipkerlikpen aınalysqan qupııa seh áshkere boldy.
Atalmysh seh birneshe jyl boıy jasyryn túrde eseptik baqylaý markasyn shyǵarýmen aınalysqan. Buǵan qosa shetelderden kontrabandalyq jolmen qymbat «Makallan», «Chıvas», «Absolıýt», «Elsın» markaly vıskı men araq jáne «Malboro», «Parlament», «Mevııýs» sııaqty temeki ónimderin aksızdik markasyz ákelip otyrǵan. Sodan keıin jalǵan jolmen ákelgen taýarlarǵa ózderi shyǵarǵan aksızdik markalardy japsyryp satýmen aınalysqan. Taýarlar Almaty qalasy men birqatar oblys ortalyqtarynyń kóńil kóteretin túngi klýbtarynda, kazınolarda, karaokı-barlarda jáne meıramhanalarda taratylǵan.
Qupııa sehty áshkereleý barysynda alynǵan jedel aqparattar boıynsha anyqtalǵan 4 kúdiktiniń úıin tintý barysynda quny 70 myń dollardan asatyn spırtti ishimdikter men 2000 danadan artyq jalǵan eseptik baqylaý markasy jáne sony basyp shyǵaratyn arnaıy apparat tabyldy, dep habarlaıdy Almaty qalalyq memlekettik kirister departamentiniń baspasóz qyzmeti.
Atalmysh oqıǵa boıynsha spırtti ishimdikterdiń sapasy men eseptik baqylaý markasynyń jalǵandyǵyn anyqtaý maqsatynda sot-taýarlyq jáne tehnıkalyq saraptama taǵaıyndaldy. Sonymen qatar, Qazaqstan Respýblıkasy Qylmystyq kodeksiniń 233, 214-baptary boıynsha №157500121001940 qylmystyq is qozǵaldy. Tergeý barysynda taǵylǵan aıǵaqtar bultartpastaı bolǵandyqtan, ustalǵandardyń óz kinálaryn tolyqtaı moıyndamaýǵa amaldary qalmady.
Aınash ESALI,
«Egemen Qazaqstan».
ALMATY.