Toı jasaýdyń bir jaqsy jeri – tam-tasyńdy túzep, jóndep, áktep-kóktep, eski-qusqy dúnıeden qutylyp, jańadan jasanyp, bir silkinip qalasyń. Dál sol sııaqty kóne Taraz qalasy Qazaq handyǵynyń 550 jyldyq toıy qarsańynda totydaı taranyp, túrlenip, eńsesin bir tiktep aldy. Endi, mine, jas urpaqqa berer taǵylymy mol bolǵan dúbirli toı ótti.
«Kelgenshe qonaq uıalady, kelgen soń úı ıesi uıalady» degendi jadylaryna jaqsylap túıgen jambyldyq sheneýnikterdiń toı qarsańyndaǵy qarbalas qımyldary da birte-birte saıabyrsyp, mańdaılaryn súrtip, arqany keńge salǵany da anyq. Áıtse de Tarazdyń tirshiligi toıdan keıin, toqyrap qalǵan joq. Jambyl oblysynyń ákimi Kárim Kókirekbaev dúbirli toı ótisimen-aq barlyq aýdandar men Taraz qalasynyń jumysyn bir sátte bosańsytpaı, ákimderge ústi-ústine tapsyrmany úıip, tipten shırata tústi. Sonymen, handyqtyń merekesi halyqtyń berekesine aınalyp, kóne shahardyń basshylyǵy sharýasyn dóńgeletip áketti.
– «Jalǵyz adam qorǵan bolmaıdy, jalǵyz aǵash orman bolmaıdy» degen bar ǵoı, – deıdi Taraz qalasynyń ákimi Nurjan Kalenderov. – Osy jergilikti halyqtyń qoldaýymen kóp is bitedi. Sonyń biri – tazalyq jumystary. Qalanyń syrtqy kelbeti men ishki tazalyǵyn jasaý barlyǵymyzdyń ortaq mindetimiz. Tazalyq jumystary jyl on eki aı boıyna júrgizilýde. Shynyn aıtý kerek, Qazaq handyǵynyń toıy kóne qalanyń syrtqy kelbetine ǵana emes, tirshiligine de úlken serpin berdi.
Qazir qalada 22 431 kásipkerlik sýbektisi tirkelgen. Onyń 17 288-i jeke kásipker, 5107-si shaǵyn jáne 36-sy orta kásiporyn sýbektileri. Shaǵyn, orta bıznes sýbektilerimen óndirilgen ónim kóleminiń úlesi 21 mlrd. 864 mln. teńgeni qurap, jalpy ónerkásip kásiporyndarymen óndirilgen ónimniń 12 paıyzyn qurapty.
– Sońǵy jyldary bıznesti damytý úshin ákimshilik kedergilerdi joıý, memlekettik satyp alý rásimderin jetildirý, erkin básekelestikti ilgeri damytý, sondaı-aq, «Bıznestiń jol kartasy-2020» baǵdarlamasy aıasynda, qoldaý kórsetý boıynsha úlken jumystar atqarylýda, – deıdi bul jóninde Taraz qalasynyń ákimi Nurjan Kalenderov. – Atap aıtar bolsaq, «Bıznestiń jol kartasy-2020» baǵdarlamasy aıasynda, 2015 jyly 3 mlrd. 438 mln. teńgege 69 joba qarjylandyryldy. Onyń ishinde jeńildetilgen nesıe berý tetikteri boıynsha 3 mlrd. 303 mln. teńgege 62 joba, óndiristik ınfraqurylymdy damytý tetigi boıynsha 123,5 mln. teńgege 3 joba jáne jańa bıznes bastamalarǵa grant bólý tetigi boıynsha 11,7 mln. teńgege 4 joba iske asyrylýda. Bul jobalar arqyly qosymsha 300 jańa jumys oryndary ashyldy.
Osy jobalar aıasynda «Aýlıe-ataTransPass» JShS «Donfeg» markaly 17 avtobýs satyp alýǵa 71 mln. teńge, «Iаslı-sad» Anet-A» JShS 250 oryndyq balabaqsha qurylysyna jáne «Zerbulaq» aýmaǵynda demalys ortalyǵyn salýǵa eki bankten jeńildetilgen 265 mln. teńge, «Araı-logıstık» JShS qonaqúı kesheni bar bıznes ortalyǵynyń qurylysyn júrgizýge 900 mln. teńge jeńildetilgen nesıe aldy. Sondaı-aq, jeke kásipker «Naýat» metall buıymdaryn hrommen jáne altynmen qaptaýdy uıymdastyrý, «Jeńisbek» JK otyn brıketin daıyndaý, «Exclusive art» JShS sellıýlozdy jylytqysh óndirý, «R & L Company» JShS bıznes portalyn qurý boıynsha jańa bıznes bastamalarǵa grant bólindi.
Árıne, oblys ortalyqtarynyń qanshalyqty damyp kele jatqany qurylys qarqynyna da baılanysty. Sońǵy kezderi Taraz qalasynda zamanaýı saýda ortalyqtaryn salý belsendi túrde júrgizilýde. Mysaly, Jambyl dańǵyly boıynda 6 myń sharshy metrdi quraıtyn 5 qabatty saýda úıi ǵımaratynyń jáne Tashkent kóshesiniń boıynda aýmaǵy 2 myń sharshy metr bolatyn 3 qabatty saýda úıiniń ǵımaraty salynýda. Burynǵy «Karavan» bazary aýmaǵynda kólemi 55,3 myń sharshy metr bolatyn «MART» iri saýda oıyn-saýyq ortalyǵy qala tirshiligin qyz-qyz qaınatatyny anyq. Árıne, bul nysandar qalanyń sáýlettik kelbetin kórkeıtip, jańa jumys oryndaryn ashyp, beı-bereket saýda máselelerin sheshýge eleýli úlesin qosady degen senim bar.
Iá, kóne Tarazda ótken bul toıdyń tarıh tórinen alar óz orny bar. Eń bastysy, halqymyzdyń ótkenin umytpaı, búginin baǵalap, bolashaqqa nyq senimmen qaraýǵa úndep, eldiń rýhyn kóterip ketti. Mine, jańa kelbetti Tarazdyń tirligi osyndaı, aǵaıyn.
Oralhan DÁÝIT,
«Egemen Qazaqstan».
Jambyl oblysy.