Naýryz aıy orta belinen asqan kezde batysqazaqstandyqtar aıaq astynan kózdi ashtyrmaıtyn aqtútek boran soǵady dep oılamaǵan edi. Yshqynǵan jeldiń ekpini atan túıeni jyǵardaı tym qatty boldy. Uıtqı soqqan boranymen jarysyp jaýǵan qar Oral óńiriniń qalasyn da, dalasyn da bir demde aq kórpege orady da tastady. Joıqyn jeldiń áserinen qalada jáne oblystyń birqatar jerinde elektr jelileri úzilip, kóshe boılaryndaǵy bılbordtardyń mata tektes materıaldary jyrtylyp jatty. 15 naýryz kúni keshki saǵat 21:00-diń shamasynda bastalǵan boran tań ata bir-aq saıabyrlady.
Ádette tótenshelikter qatty borannyń bolatynyn, jeldiń jyldamdyǵy kúsheıetinin aldyn ala habarlaýshy edi. Sirá, atalǵan qyzmet ókilderi men aýa raıyn anyqtaýshylar bul joly kútpegen jerden, ótken qys aılarynyń ózinde bolmaǵan borannyń bastalyp ketetinin boljaı almaı qalǵan sekildi, deıdi Oral qalasynyń turǵyndary. Shalǵaıdaǵy Qaztalov jáne Bókeı ordasy aýdandarynan jetken habarlarǵa qaraǵanda, alaǵaı da bulaǵaı qatty jel, boran kezinde kókten túsken qardy úrlep, eldi mekenderdiń irgesine úıip tastaǵan. Qardyń úıler men ákimshilik ǵımarattardyń esik, terezelerin basyp qalǵany sonshalyq,tańerteń syrtqa shyǵatyn esikterdi ashýdyń ózi qıynǵa túsken. Al ishine emes, syrtqa qaraı ashylatyn esikterdi ashý tipti múmkin bolmady, dep habarlady Qaztalov aýdanyndaǵy áriptesimiz Serik Jumaǵalıev.
Mine, sóıtip, keshegi kúni naýryzdyń qary Aqjaıyq atyrabyn belýardan keletin aq kórpege orady da tastady. Ári bul qubylys jyldyń jaqsy bolatynynyń bir habarshysy, dep jatty óńirdegi kónekóz qarııalar.
Temir QUSAIYN,
«Egemen Qazaqstan».
Batys Qazaqstan oblysy.