Qyzylorda qalasynda velosporttan jastar arasynda Qazaqstan chempıonaty bastaldy. Bul týraly egemen.kz tilshisi habarlady.
Syr boıynda ekinshi márte uıymdastyrylǵan veloshabandozdar chempıonatyna Astana, Almaty qalalarynan jáne Almaty, Batys Qazaqstan, Ońtústik Qazaqstan, Shyǵys Qazaqstan, Jambyl, Qostanaı, Pavlodar jáne Qyzylorda oblystarynan 80-ge jýyq veloshabandozdar qatysýda. Olar 5 kún boıy Qyzylorda-Shymkent jáne Qyzylorda-Samara baǵyttaryndaǵy tas jolda toptyq, jekeleı jáne aınalma jarystarda baq synasady. Chempıonattyń ashylý saltanattynda oblystyq dene shynyqtyrý jáne sport basqarmasynyń basshysy Sadyq Mustafaev pen Qazaqstan tarıhynda tuńǵysh álem chempıony, KSRO-ǵa eńbegi sińgen sport sheberi, Qazaqstan velosıped sporty federasııasy prezıdentiniń keńesshisi Marat Satybaldıev saıysqa qatysýshylardy quttyqtap, jeńis tiledi. Chempıonat 20 sáýirge deıin jalǵasady.
Velosport báıgesi ashylýynan keıin Qyzylorda qalasy sportshylarynyń qatysýymen velosporttan 2000 jyly týǵan jáne odan jas uldar men qyzdar arasynda toptyq jarys ótkizildi. Nátıjesinde qyzdar arasynda Arýjan Ǵalymjan jeńimpaz atansa, Anastasııa Ivanova ekinshi oryndy, Ásem Tólemisova úshinshi oryndy ıelendi. Uldar arasynda Damır Amantaıdyń mereıi ústem bolsa, Beksultan Abtaev kúmis júldeni, Artem Pervýshın qola júldeni enshiledi. Sondaı-aq, velosporttan Qazaqstan chempıonaty aıasynda birinshi ret mektep jasyna deıingi balalar arasynda «Baldyrǵan - 2016» atty Qyzylorda qalasynyń Gran-prı jarysy ótkizildi. Oǵan Qyzylorda qalasynyń 3 balabaqshasynan 3-5 jastaǵy kishkentaı balalar qatysyp, úzdikteri anyqtaldy. Uldar arasynda Farabı Ybyraev altyn júldeni ıelense, Bekbolat Shahmat ekinshi orynǵa, Aslan Sanjar úshinshi orynǵa ıe boldy. Qyzdar arasynda Inaıat Alıakbar jeńis tuǵyryna kóterilse, ekinshi oryndy Arýna Baımuhamedova, úshinshi oryndy Shuǵyla Tabylǵanova enshiledi. Jeńimpazdar men júldegerlerge Qazaqstan velosıped sporty federasııasynyń arnaıy syılyqtarymen dıplomdar tabys etildi.
Dastan Kenjalın.
Derek: Shtattaǵy ulttyq komandalar jáne sport rezervi dıreksııasy.
Foto: egemen.kz