«Jer kodeksine ózgerister men tolyqtyrýlar engizý týraly» 2015 jylǵy 2 qarashada qabyldanǵan zań onyń mánin tolyq túsinbegenderdiń kóńiline qobaljý engizgen. Osyndaıda aıqaıǵa attan qosatyndar memlekettik máseleni ýshyqtyryp, barlyq jerdi bóten bireýlerge pyshaq ústinen qyldaı bólip beretindeı úreı shaqyryp júr.
Shymkentte osy máselege baılanysty Ulttyq ekonomıka mınıstrligi Ońtústik Qazaqstan oblysynyń ákimdigimen birlese otyryp, «100 naqty qadam» Ult Josparyn iske asyrý sheńberinde Jer kodeksiniń jáne basqa zańnamalyq aktilerdi túsindirý boıynsha keńes ótkizdi. Keńeske memlekettik, jergilikti atqarýshy organdar, aýylsharýashylyq taýar óndirýshiler, úkimettik emes uıymdar ókilderi qatysty.
Keńes barysynda aýylsharýashylyq maqsattaǵy jerlerdi tıimdi paıdalaný, aýylsharýashylyq maqsattaǵy jerlerge qurylys salasyndaǵy jańa engizilimder, sondaı-aq, salyq zańnamasyna engiziletin josparlanǵan ózgerister sııaqty máseleler talqylandy.
Jıynda baıandama jasaǵan Ulttyq ekonomıka mınıstrligi departament basshysynyń orynbasary Gúljahan Bımendına memleket menshigindegi aýyl sharýashylyǵy maqsatyndaǵy jer ýchaskelerin jekemenshikke aýksıon arqyly berý, jalǵa berilgen jer ýchaskelerin satyp alý boıynsha jeńildik sharttaryn usyný, jalǵa alynǵan aýyl sharýashylyǵy maqsatyndaǵy jerlerdi paıdalaný boıynsha shekteýlerdi alyp tastaý, aýyl sharýashylyǵy jerleriniń nysanaly maqsatyn ózgertý rásimin alyp tastaý syndy ózekti máseleler boıynsha túsinik berdi.
Jıynda «100 naqty qadam» Ult Josparynyń 44-45-inshi qadamdaryn, sondaı-aq, Memleket basshysynyń 2015 jylǵy 30 qarashadaǵy «Qazaqstan jańa jahandyq naqty ahýalda: ósim, reformalar, damý» atty Joldaýyn, Úkimet pen Ulttyq banktiń ekonomıkalyq jáne áleýmettik turaqtylyqty qamtamasyz etý jónindegi 2016-2018 jyldarǵa arnalǵan daǵdarysqa qarsy is-qımyl josparyn iske asyrý sheńberinde salyq júıesin túbegeıli reformalaý kózdelgendigi aıtyldy.
Jer kodeksindegi ózgerister men tolyqtyrýǵa baılanysty jıynǵa qatysýshylar tarapynan qoıylǵan suraqtarǵa jaýap berildi.
Endi sharýalar óz jerin elý paıyz jeńildikpen jekemenshigine satylap tóleý arqyly alýǵa múmkindigi bar. Al shetelden kelgenderge jer jalǵa berilgeni bolmasa, satyp alýǵa ruqsat joq.
Baqtııar TAIJAN,
«Egemen Qazaqstan»
Ońtústik Qazaqstan oblysy