QOSTANAI. 9 mamyr. Qostanaıda aqyn Aqybek Shaıahmettiń bir jylda qatarynan birneshe kitaby oqyrmanǵa jol tartty. Osy kólemdi jumysyn aqyn shyǵarmashylyǵynyń 50 jyldyǵyna arnady. Bul týraly egemen.kz tilshisi habarlady.
Aqyn bıylǵy jyly shyǵarmashylyq qyzmetiniń elý jyldyǵyn toılaýǵa daıyndalýda. Onyń tyrnaqaldy jyrlary osydan elý jyl buryn «Qazaqstan pıoneri» (qazirgi «Ulan») gazetinde jaryq kórgen edi.
Aqylbek Shaıahmet: «Al jas aqyndardyń jyrlary toptastyrylǵan «Kóktem tynysy» jınaǵynda:«Aram sózder beıne bir kómirtegi, Adal sózder – ottegi, semirtedi. Jaqsy-jaman qasıet aralasqan sý sekildi eken ǵoı ómir, tegi. О́tkir tildiń ketpeıdi beker emi, Jyly lebiz kóńildi kóteredi. Keıbireýler qatty aıtqan jalǵyz sózge, Ǵumyr boıy ókpelep óter edi. Bireýlerge sózder bar jaraspaıtyn, Ot basynan sózder bar ári aspaıtyn. El ishinde dýaly aýyzdar bar, Syrqatyndy boıyńnan alastaıtyn. Úmit kútip otyr-aý dalam menen, Aqyn bolyp, alaýlap, janam dep em. Týǵan jerim, eń asyl, qasıetti Saqtap júrmin bir sózdi saǵan degen» degen jyrym basylǵan edi. Sol sózdiń qorytyndysy ispettes «Sóz» jınaǵy bıyl Almatydaǵy «Dástúr» baspasynan jaryq kórdi», – dedi.
«Sóz» dep atalatyn jańa óleńder jınaǵyna ár jyldary jazylǵan óleńder engizildi. Olardyń taqyryby san alýan. Avtor táýelsizdik jemisteri týraly tebirene jyrlasa, el ishindegi keleńsiz kórinisterdi tilge tıek etip, ımandylyqqa úndeıdi. Adamdar arasyndaǵy adamgershilik pen arsyzdyq, parasattylyq pen nadandyq, jaqsylyq pen jamandyq, dostyq pen qaskóılik, kishipeıildilik pen órkókirektik, eńbekqorlyq pen jalqaýlyq, márttik pen námarttyq jáne basqa jaqsy-jaman adamı qasıetter pen qasiretter jaıly daryndy aqyn tebirene qalam terbep, oqyrmandaryn jaqsydan úırenýge, jamannan jırenýge shaqyrady.
Al «Golos stepı» jınaǵy Ahmet Baıtursynov atyndaǵy QMÝ professory Iýrıı Bondarenkonyń alǵysózimen Astanada «Folıant» baspasynan jaryq kórdi. Jınaqta jazýshynyń halqymyzdyń dara tulǵalary Ybyraı, Shoqan, Ahmet, Ilııas Omarov týraly dramalyq shyǵarmalarymen qatar orys tiline aýdarylǵan prozalyq týyndylary men óleń-jyrlary bar.
Aqylbek Shaıahmettiń «Kaskalar men maskalar» dep atalǵan Qostanaıdaǵy «Qarlyǵash» baspasynan jaryq kórgen jańa kitabynda onyń keıingi jyldary jazǵan prozalyq shyǵarmalary men maqalalary, kósemsózderi toptastyrylǵan. «Aqylbek aqyn aıtqan eken» degen bólimde jazýshynyń ár jerde taban astynda aıtqan joldary jınaqtalyp otyr.
Qostanaıdaǵy «Baspa úıi» shyǵarǵan «Nar qazaq – namysy bar qazaq» atty kitaby tóte jazýmen basylǵan. Oǵan jazýshynyń sońǵy jyldary baspasóz betinde jáne ǵalamtordaǵy ártúrli saıttarda jaryq kórgen týyndylary jınaqtaldy. Jınaq shet elderde turatyn baýyrlarymyzǵa arnalǵan.
Aqynnyń dramalyq týyndylary da kórermender tarapynan jaqsy baǵa aldy. Onyń kezinde «Altyn» qalam» syılyǵyna ıe bolǵan, uly aǵartýshy Ybyraı Altynsarınge arnalǵan «Ybyraıdyń ósıeti» dramasy (rejısseri A.Lıopa) Qostanaıdaǵy orys drama teatrynda qoıylsa, «О́kinish» dep atalatyn tragıkomedııasy (rejısseri Erjan Qaýlanov) Ilııas Omarov atyndaǵy Qostanaı obystyq qazaq drama teatrynda anshlagpen ótýde.
Názıra Járimbetova.
Derek, foto: egemen.kz.