QOSTANAI. 9 mamyr. Eýrazııalyq Top (ERG) quramyna kiretin Sokolov-Sarybaı ken baıytý óndiristik birlestiginde «Aǵash otyrǵyz» aksııasy bastaldy. Bul týraly kásiporynnyń baspasóz qyzmetine silteme jasaǵan egemen.kz tilshisi habarlady.
Kóktemgi aǵash otyrǵyzý jumystaryna kásiporyn 3 mln. teńge bóldi. Bul qarajatqa 1000 pıramıdalyq terek, qaraǵash, alma aǵashy, tatar úıeńkisi, sondaı-aq, hosh ıisti mamyrgúl men ıtmuryn butalary satyp alyndy. Jasyl jelektiń negizgi otyrǵyzylatyn aýmaǵy retinde Ońtústik-Sarybaı kenishiniń sanıtarlyq-qorǵaý zonasy tańdaldy. Aǵash kóshetteriniń qalǵan bóligi Jelezorýdnyı stansasynyń turǵyn úıler aýmaǵynda oryn tebetin bolady.
Sokolov-Sarybaı ken baıytý óndiristik birlestiginiń ekologııa jáne jer qoınaýyn paıdalaný departamenti basshysy Erbolat Kóppaev: «Mundaǵy barlyq bólimshelerde ekologııany jaqsartý máselesine erekshe nazar aýdarylady. 2005 jyldan bastap birlestikte qorshaǵan ortany qorǵaýdy basqarý júıesi engizilip, tabysty jumys istep keledi. 2014 jyldyń qorytyndysy boıynsha, bıznestiń áleýmettik jaýapkershiligin yntalandyrýǵa arnalǵan «Paryz» respýblıkalyq konkýrsynda «Ekologııaǵa qosqan úlesi úshin» nomınasııasyn ıelenýimiz – osynyń dáleli. Sol jyly kásiporyn jumyskerleriniń kúshimen 10 myńnan astam pıramıdalyq terek, shegirshin, qaıyń, shyrsha, qaraǵaı men butalar ónerkásiptik alańnyn sanıtarlyq-qorǵaý zonasynyń shekarasynda otyrǵyzylǵan bolatyn», – dedi.
Bıyl jasyl jelekti otyrǵyzýda birlestik jumyskerlerine «Jastar» qoǵamdyq birlestigi kómekke kelip otyr. Uıym músheleri óz mıssııalaryn zor jaýapkershilikpen atqaryp keledi.
Sokolov-Sarybaı ken baıytý óndiristik birlestiginiń jastar resýrstyq ortalyǵy jetekshisi Maksım Frolov: «Aǵash otyrǵyz» aksııasyna qatysý – biz úshin úlken abyroı. Biz qala quraýshy kásiporyn basshylyǵy ekologııalyq máselelerdi sheshýge qashan da daıyn ekendigin jaqsy bilemiz. Naýryz aıynda BAQ-ta jarııalanǵan materıaldar negizinde zertteýler júrgizildi. Onyń nátıjesi boıynsha Rýdnyı eń az lastanǵan qalalardyń qataryna kirgen. Bul aǵashtar da jańa jerde tamyr alyp, bolashaqta adamdarǵa tek qana paıdasyn ákeledi degen úmittemin», – dedi.
Aǵashtardy otyrǵyzý naýqany mamyr aıynyń ortasyna deıin jalǵasady. Odan keıin osy jasyl jelekti kútip-baǵý jumystaryna kezek berilmek.
Názıra Járimbetova.
Derek, foto: Sokolov-Sarybaı ken baıytý óndiristik birlestiginiń baspasóz qyzmeti.