ASTANA. 9 mamyr. Qyzylordada Jeńistiń 71 jyldyǵyna arnalǵan «Qaharman urpaqqa myń taǵzym» atty mıtıng jáne gúl qoıý rásimi ótti. Sharaǵa Uly Otan soǵysy jáne tyl ardagerleri bastaǵan Syr jurtshylyǵy qatysty. Bul týraly Qyzylorda oblysy ákimdiginiń baspasóz qyzmetine silteme jasaǵan egemen.kz tilshisi habarlady.
Sharaǵa qatysýshylar aldymen qan maıdannan oralmaǵan bozdaqtardy bir mınýt únsizdikpen eske aldy. Munan keıin oblys ákimi Qyrymbek Kósherbaev bastaǵan jurtshylyq eskertkishke gúl shoqtaryn qoıdy.
Ekinshi dúnıejúzilik soǵysqa Syr óńirinen 70 myń sarbaz attansa, sonyń teń jartysyna jýyǵy elge oralǵan joq. Qazir 64 maıdangerdiń ǵana kózi tiri.
«Uly Otan soǵysy Otany men tarıhı ádildik úshin jan qııýǵa daıyn qaharman halqymyzdy kúlli álemge tanytqan qasıetti maıdan bolsa, Uly Jeńis Sizderdiń erlikterińizdi máńgilik el jadynda saqtaýǵa arnalǵan eń qasterli mereke. Bul Jeńis bolmaǵanda, búgingi Táýelsiz Qazaqstan da bolmas edi. Sondyqtan da Uly Jeńiske ólsheýsiz úles qosqan árbir ardagerge keıingi urpaq atynan myń márte alǵys aıtamyz. Sizder sııaqty jeńimpazdardyń urpaǵy, halyqtar arasyndaǵy dostyq pen birlikti qasterlegen aǵa býynnyń jalǵasy ekenimizdi árdaıym maqtan etemiz. Barshańyzdy búgingi merekemen shyn júrekten quttyqtaımyn», – dedi oblys ákimi Qyrymbek Kósherbaev.
Munan soń Jasampaz jasaq sherýi ótti. Bul joba bıyl qatarynan tórtinshi jyl júzege asyp otyr. Erikti zamattardan quralǵan sherý sapynda Uly Otan soǵysynda sheıit bolǵan, elge oralyp qaıtys bolǵan, Semeı – Nevada, Chernobyl apaty, Aýǵan soǵysy ardagerlerimizdiń urpaqtary, batyr analar, jastar bar. Bul búgingi urpaq zulmat soǵysta keýdesin oq pen otqa tosqan jaýynger babalaryn umytpaıtyndyǵynyń bir kórinisi.
Saltanatty sharada qonaqtar men soǵys jáne eńbek ardagerleri arnaıy daıyndalǵan shatyrlardan ásker botqasynan dám tatty.
Talǵat Raıymbek.
Derek, foto: Qyzylorda oblysy ákimdiginiń baspasóz qyzmeti.