ASTANA. 9 mamyr. Búgin fýtboldan Qazaqstan premer-lıgasynyń 10-týry aıasynda úsh oıyn oınaldy. Bul týraly egemen.kz tilshisi habarlady.
«Ertis» (Pavlodar) – «Taraz» (Taraz) 2:1
Goldar: Roman Murtazaev 16, Marat Shahmetov 56 (avtogol) – Malık Mane 34.
Búgingi kezdesýlerdiń ishinen Pavlodardaǵy «Ertis» – «Taraz» oıynyn asa tartysty boldy deýge tolyq negiz bar. Matchtyń 16-mınýtynda pavlodarlyqtardyń sapynan Roman Murtazaev (sýrette) nátıjeli soqqy jasap, esep ashty. Aıta keteıik, bul – Romannyń bıylǵy maýsymdaǵy 7-goly. Úshinshi oıynda qatarynan mereıi ústem bolǵan ol ázirge mergender kóshinde jeke-dara top bastap keledi.
«Taraz» oıynshylary úziliske deıin Malık Maneniń kómegimen tarazy basyn teńestirgen bolatyn. Alaıda, qarsylastarynyń ekinshi taımdaǵy tolassyz shabýyly óz jemisin bermeı qoımady. Sondaı sátterdiń birinde Marat Shahmetov óz qaqpasyna gol soǵýǵa májbúr boldy. Bul oıynnyń 56-mınýty bolatyn. Qalǵan ýaqytta tablodaǵy esep ózgerissiz qalyp, alań ıeleri jeńiske jetti. Osy jeńisten keıin «Ertis» 26 upaımen týrnır kestesinde kósh bastady. Alaıda, erteń óz alańynda Oraldyń «Aqjaıyǵyn» qabyldaıtyn «Astana» komandasynda pavlodarlyqtardy ekinshi orynǵa yǵystyrýǵa múmkindik mol. Ol úshin elordalyqtar atalǵan kezdesýde upaı joǵaltpaýy tıis.
«Ordabasy» (Shymkent) – «Shahter» (Qaraǵandy) 2:0
Goldar: Azat Nurǵalıev 22 (penaltı), Erkebulan Tuńǵyshbaev 47.
Shymkentte jergilikti «Ordabasy» Qaraǵandynyń «Shahterimen» kezdesip, 2:0 esebimen jeńiske jetti. Birinshi taımda Azat Nurǵalıev on bir metrlikten esep ashsa, ekinshi bólikte Erkebulan Tuńǵyshbaev mergendigimen kózge túsip, esepti eseledi. Bul jeńisten keıin «Ordabasy» týrnır kestesinde 3-orynǵa kóterildi. Degenmen, 10-týrdyń sońǵy qorytyndysy boıynsha shymkenttikterdi «Oqjetpes» komandasy basyp ozýy ábden múmkin. Atap aıtqanda, erteń kókshetaýlyqtar syrt alańda Taldyqorǵannyń «Jetisýyn» jeńse, qaıtadan úzdik úshtiktiń qataryna qosylady.
«Aqtóbe» (Aqtóbe) – «Atyraý» (Atyraý) 1:0
Gol: Dıdar Jalmuqan 74 (penaltı).
Aqtóbede ótken batys derbıinde alań ıeleri basym tústi. Bul matchta oıyn taǵdyryn penaltıden soǵylǵan jalǵyz gol sheshti. Kezdesýdiń 74-mınýtynda Dıdar Jalmuqan on bir metrlikti dál oryndap, komandasyna jeńis syılady. Osylaısha, «Aqtóbe» 15 upaımen týrnır kestesinde 5-orynǵa nyq taban tiredi.
Erteń, ıaǵnı 10 mamyrda týrdyń qalǵan úsh oıyny oınalady. Atalǵan matchtarda myna komandalar kezdesedi:
«Astana» (Astana) – «Aqjaıyq» (Oral)
«Tobyl» (Qostanaı) – «Qaırat» (Almaty)
«Jetisý» (Taldyqorǵan) – «Oqjetpes» (Kókshetaý).
Elaman Qońyr.
Derek: egemen.kz.
Foto: vk.com.