Mońǵolııadaǵy qazaq generaly

qurmetpen eske alynyp, rýhyna taǵzym etildi Mońǵolııanyń astanasy – Ýlan-Bator qalasynda Mońǵolııanyń ataq­ty qazaq ushqyshy, Mońǵolııa áýe kúsh­teriniń bas qolbasshysy, general-maıor Múdáris Zaısanovty eske alýǵa arnalǵan shara ótkizildi. Ony Qazaqstannyń Mońǵolııadaǵy elshiligi Otan qorǵaýshy kúnine oraı uıymdastyrdy. Shara batyrdyń beıitindegi qulpy­tasqa gúl shoqtaryn qoıýdan bastaldy. Rásimge Qazaqstan Respýb­lıkasynyń Mońǵolııadaǵy elshisi Qalybek Qob­landın, Mońǵolııa Parlamentiniń depýtattary Tileıhan Almalyq, Bákeı Aǵypar, jazýshy, Mońǵolııanyń belgili qoǵam qaıratkeri Sultan Táýkeıuly jáne Mońǵolııanyń eńbek sińirgen ushqyshy, otstavkadaǵy podpolkovnık Táshtýan Tóteıuly qatysty. Múdáris Zaısanov – Mońǵolııa qarýly kúshterinde qyzmet atqaryp, general-maıor dárejesine deıin jetken. Ol 1910 jyly qazirgi Shyǵys Qazaq­stan oblysyna qarasty Zaısan óńirin­de týǵan. Al 1920 jyldary onyń 10 jasynda ata-anasy Mońǵolııaǵa qonys aýdar­ǵan. Bolashaq dańqty ushqysh 1932 jyly Orynbor ushqyshtar daıarlaıtyn ýchılıshesin bitirgen. Ol ekinshi dúnıe­jú­zilik soǵystyń aldynda Halhın-Gol shaıqasyna qatysyp, teńdessiz erlik­tiń úlgisin kórsetken. Osy úshin Moń­ǵolııa men Keńes Odaǵynyń eń joǵarǵy nagradalarynyń biri – «Qyzyl tý» ordenimen marapattalǵan. Al 1942 jyly general-maıor sheninde Mońǵolııa Áýe áskerleriniń bas qolbasshysy laýazymyna taǵaıyndalǵan. General Múdáris Zaısanov 1967 jyly 57 jasynda Ýlan-Batordyń áskerı gospıtalinde qaıtys bolǵan.  Murat AITQOJA