Aqtóbelikter Uly Jeńistiń 71 jyldyǵyn keń kólemde atap ótti. Merekelik saltanattyń basty sharasy «Máńgilik alaý» alańynda uıymdastyryldy.
Munda soǵys jáne eńbek ardagerleri, aqtóbelikter, qaladaǵy áskerı bólimderdiń jáne kúsh qurylymdarynyń jeke quramdary men Talǵat Bıgeldınov atyndaǵy áýe kúshteri áskerı ınstıtýtynyń kýrsanttary, jastar jınaldy.
Oblys ákimi Berdibek Saparbaev Uly Otan soǵysy jáne eńbek ardagerlerimen jeke-jeke amandasyp shyqty,Uly Jeńistiń 71 jyldyǵymen quttyqtady.
– Soǵys qanshama bozdaqtyń ómirin qıdy. Otan qorǵaýǵa 122 430 jerlesimiz qatysqan eken. Osy qan-qasap maıdan dalasynan oralmaǵandardyń 38 myńy – aqtóbelikter. Uly Otan soǵysynda 35 aqtóbelik Keńes Odaǵynyń Batyry, 9 jerlesimiz «Dańq» ordeniniń tolyq kavaleri atandy. Sizderdiń erlikterińiz ben tyldaǵy eńbekterińiz keıingi urpaqqa ónege. Biz sizderdiń aldaryńyzda máńgilik basymyzdy ıemiz, – dedi Berdibek Máshbekuly.
Oblystyq ardagerler keńesiniń tóraǵasy Keńes Birmanov soǵys ardagerleriniń Elbasy men óńir basshysynyń qamqorlyǵyna alynyp, udaıy qoldaý kórsetilip otyrǵanyn jetkizdi. Sharaǵa qatysýshylar qaza bolǵan maıdangerlerdi bir mınýt únsizdikpen eske aldy, úsh dúrkin salıýt berildi.
Merekelik saltanat aqtóbelik óner sheberleriniń merekelik konserttik baǵdarlamasyna ulasty.
Satybaldy SÁÝIRBAI,
«Egemen Qazaqstan»
AQTО́BE