Byltyr «EKSPO-2017» halyqaralyq kórmesi aıasynda Baıanaýylda týrızmdi damytý maqsatynda «Samruq-Qazyna» AQ-nyń uıymdastyrýymen «Meniń elim» atty kishi bıznes jobalar baıqaýy ótken-di. Aýdan ortalyǵyndaǵy Sh.Aımanov atyndaǵy mektep-ınternat shyǵarmashylyq toby da baıqaýǵa qatysyp júldeger atandy. Shaǵyn grant 1 mıllıon teńge turady. Osy qarjyǵa 15 velosıped satyp alyndy. Sóıtip «Baıanaýylda ekologııalyq velotýrızmdi uıymdastyrý» jobasyn bastap ketti. Maqsat – aýdanda velodesant toptaryn quryp, ekologııalyq velotýrızmdi uıymdastyrý, oqýshylar úshin ekologııa, bıologııa, geografııa pánderi boıynsha teorııalyq jáne praktıkalyq sabaqtardy tabıǵat aıasynda ótkizý. Ekinshiden, aýyldyqtardyń da bos ýaqyttaryn tıimdi paıdalaný arqyly týrızm aýmaǵyn qoqystan tazartyp, salaýatty ómir saltyn ustaný.
– Qazir Baıanaýylda básekege qabiletti týrızm klasterin qalyptastyrý úshin kóp jumystar atqarylýda. Velotýrızm shilde-qazan aılary aralyǵynda ótedi,– deıdi aýdan ákimi Orazgeldi Qaıyrgeldınov. – Sondyqtan «Baıanaýylda ekologııalyq velotýrızmdi uıymdastyrý» jobasy aýdanda týrızmniń damýyna serpin beredi dep oılaımyn.
Al mektep-ınternat dırektory Saltanat Dosmaǵambetovanyń aıtýynsha, áleýmettik kásipkerlikti damytý jobasy boıynsha mektep-ınternat oqýshylarynyń bos ýaqytynda jumyspen qamtýdy, eńbekke baýlýdy oılastyrypty. Jumysqa 7-9 synyptyń ul balalary tartylady. Oqýshylar Sabyndykól, Jasybaı kólderiniń jaǵajaılary, Jasybaı batyr zıratynyń mańaıy, Baıanaýyl aýylynyń mańaıyndaǵy bulaqtar, ormandardy tazalaıdy. Velosıpedter mektep-ınternattyń múlki esebinde tirkelgen. Taý-tasqa yńǵaıly, 8 rejimdi jyldamdyǵy bar taýly jerge arnalǵan velosıpedter. Áleýmettik kásipkerlik jobasyna muǵalimder Erjan Rahymtaev, Nurbol Abdýevter jetekshilik jasaıdy. Mektep-ınternat 446 oqýshyǵa bilim men tárbıe berýde 446 oqýshynyń 205-si ınternatta, Baıanaýyldyń shalǵaı aýyldary Josaly, Aqshı, Egindibulaq, Kókdombaq, Toraıǵyr, Qaratomar, Belaǵash, Janatilek, Birinshi mamyr jáne jeke ornalasqan bólimsheler men fermalardan kelgen oqýshylar oqıdy. Qalǵan 241 bala aýdan ortalyǵynda óz úılerinde turady.
Tipti velosıpedti jalǵa alǵan adamǵa qoqys salatyn qap beriledi. Velosıped arqyly densaýlyǵyn da shynyqtyrady, qoqys qaldyqtaryn da jınaıdy. Jalǵa alý quny saǵatyna – 500 teńge. Túsken qarajat oqýshylardyń eńbek aqysyna, respýblıkalyq «Mektepke jol» aksııasy boıynsha az qamtamasyz etilgen jáne kópbalaly otbasylardyń balalaryna kómek retinde berilipti. Shahmat kabınetin jabdyqtaýǵa, gımnastıka zalyna jıhaz alýǵa jumsaldy.
Iá, Baıanaýyl týrızmi keremet-aq. Biraq týrızmdi damytýmen birge, tabıǵattyń lastaný jaǵdaıy alańdatady. Ekologııalyq sana, ekologııalyq mádenıettiń tómen bolýynan demalýshylar sońynda qoqys qaldyrady.
– Sondyqtan, – deıdi mektep dırektory Saltanat Dosmaǵambetova. – «Baıanaýylda ekologııalyq velotýrızmdi uıymdastyrý» atty bıznes-jobamyzdy «Meniń elim» baıqaýyna usyndyq. Bizdiń mektep-ınternat ujymy osy joba arqyly Baıanaýylda týrızmdi damytý men qorshaǵan ortany saqtaý máselesin sheshetin joldy usynyp, úles qosýda. Adam men tabıǵat arasynda baılanysty ornatýdaǵy jalpy mádenıettiń bir bóligi retinde adamdy ekologııalyq mádenıetke tárbıeleý, taza aýamen tynystap, densaýlyǵyn nyǵaıtý kerektigin uqtyrǵymyz keledi.
Farıda BYQAI,
«Egemen Qazaqstan»
Pavlodar oblysy,
Baıanaýyl aýdany
Sýretti túsirgen Erjan RAHYMTAI
