Sharanyń ashylý saltanatynda sóılegen sózinde oblys ákiminiń birinshi orynbasary Aıdarbek Saparov Elbasy Joldaýynda óńirlik deńgeıdegi rezervterdi taýyp, buqaralyq sport pen deneshynyqtyrýdyń qoljetimdiligin arttyrý mindeti qoıylǵanyn, elimizde kem degende 100 deneshynyqtyrý-saýyqtyrý keshenin salý tapsyrmasy berilgenin, onyń alǵashqy qadamy Qyzyljar óńirinde bastaý alǵanyn atap ótti. «О́ńirde birneshe kóshe batyr esimimen atalady. Onyń atyndaǵy mektep aldyna eńseli eskertkish qoıylǵan. 14 jasynan atqa qonyp, qolyna naıza ustap, qazaq jerin jońǵar shapqynshylyǵynan qorǵaýda nebir erlik kórsetken, qol bastaǵan babamyzdy qalaı ulyqtasaq ta jarasady. Abylaı han onyń aqyldylyǵyn, erjúrektigin úlgi etken. Soltústikqazaqstandyqtardyń 30 paıyzǵa jýyǵy sportpen shuǵyldanyp, jastarǵa salamatty ómir súrý úlgisin kórsetip keledi. Jýyrda Petropavl qalasynda memlekettik-jekemenshik áriptestigi sheńberinde ámbebap tennıs ortalyǵy turǵyzyldy. Bul úrdis aldaǵy ýaqytta da óz jalǵasyn tabady», deı kelip, Aıdarbek Seıpiluly aımaq basshysy Qumar Aqsaqalovtyń jyly lebizge toly quttyqtaýyn jetkizdi.
Batyr Baıannyń altynshy urpaǵy Zeınolla qajy Oljabaev, oblystyń qurmetti azamaty, dańqty sportshy Jambyl Tasemenov, aýyr atletıkadan oblystyń aǵa jattyqtyrýshysy Erik Álibaev, taǵy basqalary qýanyshqa ortaqtasyp, ult densaýlyǵynyń mańyzyna toqtaldy. Aýdan ákimi Asqar Begmanov baıraqty básekelerde olja salyp júrgen jergilikti sportshylar men jattyqtyrýshylardy marapattap, aqshalaı syıaqylar tabys etti. Olardyń arasynda aýyr atletıkadan Azııa chempıony Aıdar Qazovtyń esimi erekshe ataldy. Jerlesimiz qazir álem birinshiligine daıyndalýda.
1100 sharshy metr aýmaqty alyp jatqan keshendi salýǵa qazynadan 80 mıllıon teńge baǵyttaldy. Munda endi aýyl balalary kúres, aýyr atletıka, sporttyń basqa da túrlerimen erkin aınalysatyn bolady.
Saltanatty rásim qazaq kúresinen Batyr Baıan atyndaǵy respýblıkalyq jarysqa ulasyp, osymen ekinshi ret uıymdastyrylǵan ashyq týrnırge alań ıelerimen qatar Aqmola, Túrkistan, Qaraǵandy oblystarynan saıdyń tasyndaı iriktelgen palýandar jınaldy. Olar 80 kılodan joǵary salmaq boıynsha ózara kúsh synasyp, «Túıe palýan» ataǵyn sarapqa saldy.
Boz kilemge birinshi bolyp kóterilgen Túrkistan oblysynyń ókili Ersultan Muzaparov Soltústik Qazaqstan oblysynyń namysyn qorǵaǵan qarsylasyn taza jyqty. Ol ekinshi beldesýinde de alań ıesi Alpysov Dýlatty erkin utyp, bas júldeden úmitkerlerdiń biri ekenin tanytqan edi. Alaıda 2014 jylǵy «Qazaqstan barysy», eki dúrkin álem chempıony Muhıt Tursynovtan jeńilis tapty. Muhıt Shyǵystyń týmasy bolǵanymen, búginde «Qyzyljar arlandary» kúres ortalyǵynda jattyǵady. Muhıttyń aldyn Azııa jeńimpazy, halyqaralyq dárejedegi sport sheberi Seıten Aıbat orap ketti. Ol aqtyq beldesýde M.Jumabaev aýdanynyń palýany Aqjigit Oralovtyń osal jerin dóp basty. Beldesý aıaqtalýǵa sanaýly sekýndtar qalǵanda onyń bosańsyǵanyn paıdalanyp, qapy qaldyrdy.
Sóıtip «Uzynkól» sharýa qojalyǵynyń jetekshisi Qanat Álmuratov bas júldege tikken jeńil kólikti qanjyǵaǵa baılady.
О́mir ESQALI,
«Egemen Qazaqstan»
Soltústik Qazaqstan oblysy
