Mindet jáne erlik
Beısenbi, 1 qarasha 2012 7:11
Qandyqol qaraqshyny ustaý úshin tek kúshtilik azdyq etetini anyq. Bul jaǵdaıda, aldymen adamnyń erjúrektiligi, ıaǵnı batyrlyǵy asa qajet. Mundaıda qoryqqanǵa qos kórinedi deıdi, al qoryqpaǵan jaýyn qalaıda tize búktire alatynyn biledi. Sonyń bir dálelindeı, Aqtóbe oblystyq IID JPB aǵa ınspektory Álıhan Túgiltaev asa qaýipti qylmyskerdi ustaýda óziniń batyrlyǵy men erjúrektiligin kórsetti. Ol ózi qatty jaraqattansa da qandybalaq qylmyskerdiń qashyp ketýine jol bermedi. Al qylmyskerdiń jolyn Álıhannyń ózi kesti.
Beısenbi, 1 qarasha 2012 7:11
Qandyqol qaraqshyny ustaý úshin tek kúshtilik azdyq etetini anyq. Bul jaǵdaıda, aldymen adamnyń erjúrektiligi, ıaǵnı batyrlyǵy asa qajet. Mundaıda qoryqqanǵa qos kórinedi deıdi, al qoryqpaǵan jaýyn qalaıda tize búktire alatynyn biledi. Sonyń bir dálelindeı, Aqtóbe oblystyq IID JPB aǵa ınspektory Álıhan Túgiltaev asa qaýipti qylmyskerdi ustaýda óziniń batyrlyǵy men erjúrektiligin kórsetti. Ol ózi qatty jaraqattansa da qandybalaq qylmyskerdiń qashyp ketýine jol bermedi. Al qylmyskerdiń jolyn Álıhannyń ózi kesti.
Aral qalasynda birneshe dúrkin aýyr qylmystar jasasa da aılasyn asyryp saqshylardan qutylǵan buzaqy Qanat Aqtóbe qalasyna kelip, bas saýǵalaǵan. Eger munda qarasyn kórsetpeı, únin shyǵarmaı buqpantaılap júre berse qolǵa ilikpes pe edi. Biraq úırenshikti kásibinen qol úze almaǵan qaraqshy ǵadettengen isine qaıta kirisedi. Sóıtip, Aqtóbe qalasynyń shet jaǵynda turǵan úıdiń ıeleri uıqyǵa ketti-aý degen kezde tún jamylyp shatyr arqyly ishke enedi. Munda kimder turatynyn ol aldyn ala zerttegen. Sondyqtan úı ıelerinen ózine asa qaýip kelmeıtinin de bilgen. Tátti uıqyda jatqan olardy sýyq qarý kezenip oıatqanda baıǵus erli-zaıyptylardyń til-aýyzdary baılanyp qaldy. Qatty qoryqqannan shybyn jandaryn saqtap qalý úshin, amal joq, bar jıǵan aqshalary men tyqqan baǵaly zattaryn ustata berdi.
Beıbit jandardy tonap, qany qaraıǵan qaraqshy ońaı oljaǵa birden qoly jetkenine masattanyp, sonan úı ıesine ózin qalanyń bir shetine jetkizip tastaýdy buıyrdy. Qarýly qylmyskerden tez arada qutylýdy ári ony otbasynan alastatý amalyn oılap turǵan otaǵasy «Aýdı» kóligin kóldeneń tartty. Eger osydan polısııaǵa habar beretin bolsań áýeli kúıeýińdi, sosyn qaıtyp kelip ózińdi óltiremin, deıdi áıelge myltyq aýzyn taqaǵan qaraqshy. Alaıda, birge ketse kúıeýinen aıyrylyp qalamyn dep oılaǵan áıel kólikti de qosa berdik óziń alyp ket dep zar ıledi. Biraq kózi qyzarǵan qylmysker aıtqanynan tanbaı úı ıesin tapanshamen túrtip, kúshtep rólge otyrǵyzdy. Sonan qylmyskerdi kóligine otyrǵyzǵan kúıeýi aýladan shyǵyp ketisimen áıel polısııaǵa habar berdi.
Saqshylar «Ustaý» arnaıy josparyn qurdy. Barlyq nútelerde turǵan kezekshi polıseılerge habar jiberildi. Bul habardy jol boıynda kólik qozǵalysy erejesin baqylap turǵan polısııa maıory Álıhan Túgiltaev pen polısııa aǵa serjanty Izbasar Dáribaev ta estidi. Kóp keshikpeı olar ózderine qaraı júıtkip kele jatqan «Aýdı» kóligin baıqady. Onyń ishinde kólik júrgizýshisin kepilge alyp, jolynda kezdesken kedergini joıý úshin bárine barýǵa daıyn qarýlanǵan asa qaýipti baskeser otyrǵanyn bular jaqsy bildi. Sondyqtan óte saq ta, batyl qımyldamasa, qatelik orny tolmas ókinishke ushyratýy múmkin edi.
Ekeýi esh kúdik týdyrmaı ádettegi jol boıynda tártip saqtap júrgen polıseı retinde «Aýdı» kóligin toqtatty. Qujattaryn alyp júrgizýshi syrtqa shyqty. Mine, tap osy sátti kútip turǵan Álıhan ishke atyla enip, qylmyskerdi bas saldy. Alaıda, ol da daıyn otyr eken, aıaq astyna qolyndaǵy jarylǵysh zatty tastap jiberdi. Sóıtti de ózi ashyq esikten dalaǵa ytqyp shyǵýǵa árekettendi. Biraq ony Álıhan ustap qaldy. Bul kezde jarylǵysh zat ta jarylyp úlgerdi. Osy bir qas-qaǵym sátti paıdalanǵan qaraqshy Qanat jantalasa qutylmaq boldy. Al jarqynshaq aıaǵyna tıip jaralansa da Álıhan qasha jónelgen qylmyskerdi Izbasarmen birge qaıta ustaýǵa umtyldy. Ekeýlep ony qýyp jetip, eki búktedi. Qolyn qaıyryp kisen saldy.
…Keıin Aqtóbe oblysynyń IID JPB aǵa ınspektory, polısııa maıory Álıhan Túgiltaev asa qaýipti qarýlanǵan qylmyskerdi ustaýdaǵy kórsetken erligi úshin Elbasynyń Jarlyǵymen III dárejeli «Aıbyn» ordenimen marapattaldy.
Aleksandr TASBOLATOV,
«Egemen Qazaqstan».
