Keshegi Jeltoqsanda alańǵa shyqqan jastardyń talaby da azattyqqa umtylǵan aýyr joldaǵy tarıhı oqıǵa edi. Qandyqol keńestik bılik qarýsyz sherýshilerdi aıaýsyz basyp-janshyǵanymen jastardyń rýhy janshylǵan joq. Sol jastardyń muzda jaqqan alaý ushqyny búkil elge taralyp kete me dep qaýiptengen bılik barlyq jerde jınalystar uıymdastyryp, alańǵa shyqqandardy qoǵamdyq aıyptaýǵa kiriskeni belgili. «Nashaqorlar, ishkishter, úkimetke qarsy shyqqan buzyqtar, ınternasıonaldyq tárbıesi durys emes» degen neshe túrli aıyptaýlar aıtylyp, túgel sottaý, jazalaý kerek degen usynystar estilip jatty. Bul naýqan sonaý túkpirde jatqan Katonqaraǵaıdaǵy Rykov mektebin de aınalyp ótpedi. Sondaı bir jınalysta sóz alǵan aýdandyq partııa komıtetinen kelgen ókildiń «jastarǵa durys tárbıe berilmegen, esirtki shegip, araq iship, eldi búldirdi» dep ekpindetip sóılegeni esimde. Keıbir muǵalimder bastaryn shulǵysa, birazy tómen qarap otyrdy. Shydamadym, ishim qyj-qyj qaınap, ornymnan tez turyp: «Qalaı ǵana jastardy dattaısyńdar? Olar eshqandaı narkoman, ishkishter emes. Olar sholaq saıasatqa qarsy shyqqan ulttyq rýhy myqty jastar, biz olardy jaqtap qorǵaýmyz kerek», dedim.
Meni qoldap ózimniń shákirtim, qazaq ádebıeti pániniń muǵalimi Ermek Saharıev sóıledi. «Galına Nıǵymashqyzy durys aıtady, sholaq saıasattyń áserinen ishki biteý jara jarylyp, shyqpaı qoımady», dedi.
Ulttyq qundylyqtaryn qorǵap, óz pikirin bildirmek bolǵan jastardyń beıbit áreketin dattaý, qaralaý jınalysynyń sońy daýysqa salýmen aıaqtaldy. Al bizge qatań sógis berildi.
Sóıtken Keńes Odaǵy kóp uzamaı-aq ydyrady. Halqymyz ańsaǵan Táýelsizdikke jettik. Meniń jastarǵa aıtarym: Qazaq bolyp týdyń ba, anańnyń aq sútin emdiń be, qazaqqa máńgi-baqı qaryzbyn dep sanaýyń kerek. Ulttyq rýhty kúsheıtip, salt-dástúrdi nasıhattaýǵa, til men dindi damytyp, urpaqqa durys tárbıe berýge mindettimiz. Ulttyq, birlik, ulttyq sana, ulttyq til birinshi orynda turý kerek. Ulttyq rýhymyzdy tómendetpeıik, oılanaıyq, saralaıyq, saq bolaıyq, aǵaıyn!
Táýelsizdigimiz máńgilik bolsyn! Kók týymyzdyń tuǵyry myqty bolyp, bıikte jelbireı bersin!
Galına IBRAIMOVA,
zeınetker-ustaz
Shyǵys Qazaqstan oblysy,
Katonqaraǵaı aýdany,
Katonqaraǵaı aýyly
